KOORDENADÓR KTE ATUALIZA PROGRESU SERVISU RELASIONA HO PROGAMA UNIQUE ID NIAN BA PCM

 
Diretór Ezekutivu Ajénsia Tecnologia da Informação e Comunicação (TIC) TIMOR I.P, Roberto Caitano de Sousa Vicente, hanesan mós koordenadór Komisaun Téknika Eventual (KTE) ba programa Unique ID, hamutuk ho ekipa sekretariadu Unique ID hala’o enkontru ho Ministru Prezidénsia ba Konsellu Ministru, sigla português (PCM), Fidelis Manuel Leite Magalhães, iha sala reuniaun PCM.
 
Objetivu husi sorumutu ne’e, atu atualiza progresu servisu ne’ebé la’o, liu-liu preparasaun dokumentu integradu ba implementasaun Unique ID no informa mós kona-ba ezbosu ne’ebé finaliza ona no lidera husi ekipa PCM rasik.
 
Ekipa ne’e mós, halo ona konsultasaun ho KTE, ho objetivu atu hetan feedback nune’e, bele hahú akomoda opiniaun sira ne’ebé iha atu enrikeza dokumentu.
 
Iha sorumutu ne’e, Diretór Ezekutivu mós informa ba Ministru PCM katak, hafoin KM aprova rezolusaun iha tinan kotuk ho opsaun ne’ebé KTE aprezenta no ekstende mós mandatu ba KTE to’o iha fulan Marsu, ho nune’e husi sekretariadu hahú ona servisu husi fulan Janeiru hodi haktuir deadline ne’ebé KM fó katak, to’o Marsu tenke submete dokumentu refere ba KM atu halo aprovasaun. Ho ida ne’e, sekretariadu UID hamosu ona time line ida ne’ebé elabora atividade tomak hahú husi Janeiru to’o iha Marsu.
 
Ekipa ne’e mós hahú halo konsultasaun públiku ho sosiedade sivíl sira hanesan ho FONGTIL, LAO HAMUTUK, ADTL no sei halo mós konsultasaun ho JSMP.
 
Iha mós planu atu halo mós konsultasaun ho liña ministerial sira inklui parseiru dezenvolvimentu sira. Iha konsultasaun ho parseiru dezenvolvimentu barak maka atu halo konsultasaun maibé la sees husi parseiru ne’ebé maka durante ne’e fó apoiu iha parte kooperasaun planu estratéjiku sira hanesan, Banku Mundial, ADB, DFAT, UNICEF, UNDP nomós NGO internasionál sira.
 
KTE iha konfiansa tomak katak, bele tuir planu ne’ebé maka iha, to’o fulan Marsu ekipa ida ne’e bele submete ba iha KM atu bele hetan apresiasaun hodi bele finaliza servisu.
 
Hatán ba ida ne’e Ministru PCM hatete, bainhira aprezenta inisiativa ida ne’e, preokupasaun ida maka tenke lalais tuir deadline ne’ebé  iha konforme relatóriu ne’ebé hato’o prosesu hela atu bele halo hotu submete bazeia ba períodu ne’ebé fó husi KM.
 
Komponente ne’e maka tenke anota pontu balun kona-ba publikasaun sira no presiza avansa dokumentu sira tradús hotu atu bele asesu universal.
 
Nia mós sujere atu ekipa husu reuniaun ho Sekretáriu Estadu no Vise Ministru sira hodi esplika kona-ba ida ne’e, atu bele hatene lala’ok to’o ona iha ne’ebé no fahe bazeia ba sira nia área relevánsia husi sira nia koñesimentu kona-ba lala’ok ne’e rasik.
 
 
Kona-ba ba kuadru jerál sira Governu Amerikanu fó apoiu kona-ba lei protesaun dadus, Ministru sujere atu la’o ho draft  ida de’it.  #MÉDIA TIC#