KTE HALO KONSULTASAUN PÚBLIKU HO PARSEIRU DEZENVOLVIMENTU SIRA KONA-BA IMPLEMENTASAUN PROGRAMA UNIQUE ID

Koordenadór Komisaun Téknika Eventual (KTE) ba programa Unique ID, Roberto Caitano de Sousa Vicente, hamutuk ho ekipa sekretariadu Unique ID, halo konsultasaun ho parseiru dezenvolvimentu sira hodi rekolla informasaun, opiniaun no komentáriu sira hodi fó apoiu ne’ebé di’ak liu tan nune’e bele hadi’a liu tan prespetiva ba implementasaun programa refere.

 

Iha abertura ba konsultasaun públiku ne’e, Ministru Prezidénsia Konsellu Ministru sigla português (PCM), Fidelis Manuel Leite Magalhães agradese ba apoiu no asisténsia ne’ebé di’ak tebes husi parseiru dezenvolvimentu sira ba elaborasaun planu estratéjia refere.

 

Nia esplika katak, planu estratéjia ne’e rasik agora dadauk iha faze diskusaun nia laran tanba ne’e iha momentu ne’e oportunu tebes atu simu komentáriu sira hodi mellora perspetiva ba programa ne’e rasik.

 

Unique ID sei sai elementu sentrál ba reforma administrasaun públika ho objetivu atu hadi’a di’ak liu tán servisu administrasaun no diminui falsifikasaun dokumentu. Sistema ne’e, sai hanesan baze husi Governu Eletróniku no tranzasaun online.  

 

Iha biban ne’e, Koordenadór KTE hanesan mós Diretór Ezekutivu TIC TIMOR hatete, sei halo konsultasaun barak tanba Unique ID ne’e, sei sai baze ba implementasaun Governu Eletróniku no ida ne’e mai husi komponente ida mai husi esforsu Governu nian atu reforma administrasaun tomak no tenke haree oinsá bele hamosu inisiativa ida atu fó apoiu ba esforsu ida ne’e no nune’e hamosu programaUnique ID.

 

Konsultasaun hahú parseiru dezenvolvimentu sira no ikus liu iha loron 26 no sei halo mós konsultasaun iha parte legal balun hanesan ezbosu lei kona-ba protesaun dadus, ezbosu lei ba privasidade hamosu mós estratéjia kona-ba sibernétika nian no lei sira seluk hanesan lei fornese eletróniku, propriedade intelektuál ne’e hola parte husi produtu legal ne’ebé maka sei fó apoiu di’ak liu tan bainhira implementa programaUnique ID.

 

Entretantu ekipa halo mós konsultasaun ho sosiedade sivíl sira, setór privadu sira hodi rekolla informasaun no opiniaun . #MÉDIA TIC#