MAE HAKARAK SENTRALIZA PORTAL MUNISIPÁL BA SENTRU DADUS TIC TIMOR

Relasiona ho papél Ajénsia Tecnologia da Informação e Comunicação (TIC) TIMOR I.P nian, atu sentraliza dadus Governu nian tanba ne’e, Ministériu Administrasaun Estatál (MAE) ne’ebé antes ne’e servisu hamutuk ho United Nations Development Programme (UNDP) hodi dezenvolve portal munisipál no hosting iha Amazonia, Estadu Unidos Amérika (EUA) hakarak atu hosting fali iha sentru dadus Governu nian ne’ebé Jere husi TIC TIMOR nune’e bele seguru.
 
Tanba VIII Governu konstitusionál tau prioridade importante ba asuntu refere atu fasilita koordenasaun entre liña ministeriál sira liu husi aplikasaun informátika.
 
Ho rajaun ida ne’e, parte MAE no UNDP hala’o sorumutu ho Diretór Aplikasaun TIC TIMOR, Justo Fernandes ho ekipa tékniku atu oinsá ba futuru sentraliza iha sentru dadus TIC TIMOR nian.
 
Iha sorumutu ne’e Diretór Aplikasaun TIC TIMOR afirma katak, MAE no UNDP nia planu atu halo migrasaun mai sentru dadus TIC TIMOR ne’e di’ak tanba, Ajénsia ne’e estabelese atu responde nesesidade hirak ne’e no prontu atu halo manutensaun inklui fó apoiu tékniku.
 
Entretantu iha biban ne’e mós ekipa tékniku husi MAE, UNDP no TIC TIMOR halo diskusaun tékniku kona-ba oinsá atu muda portal refere ba iha sentru dadus Governu nian.  #MÉDIA TIC#