MAE HUSU TIC TIMOR ATU FÓ APOIU IHA ÁREA TEKNOLOJIA

Ministru Administrasaun Estatál (MAE) Miguel Pereira de Carvalho ho nia ekipa, hala’o enkontru ho Diretór Ezekutivu Ajénsia Tecnologia da Informação e Comunicação (TIC) TIMOR I.P, Roberto Caitano de Sousa Vicente ho ekipa hodi husu oinsá TIC TIMOR I.P apoiu MAE iha área teknolojia nian.
Iha sorumutu ne’e Ministru hatete, ho apoiu TIC TIMOR nian, oinsá bele ajuda MAE atu haree infraestrutura ministériu nian hodi asesu ba rede internet nomós sistema komunikasaun hanesan email, data center tanba ministériu laiha data center no seidauk iha email official.
Nia informa, iha nivel munisipál to’o postu administrativu inklui nivel suku mós presiza tau ideia hamutuk kona-ba levantamentu dadus eletróniku hanesan Fixa Família.
Hatán ba ida ne’e, Diretór Ezekutivu TIC TIMOR I.P hatete, MAE nia pasta boot loos to’o nivel aldeia tanba ne’e hanesan parseiru estratéjiku ba TIC TIMOR atu fó apoiu.
MAE nian nesesidade ne’ebé iha, TIC TIMOR I.P prontu atu fornese tantu husi konetividade ba internet, no konetividade ba iha data center TIC TIMOR nian.
Dadus sira bele sentraliza hotu tanba iha vantajen barak hanesan atu hasa’e koordenasaun servisu ba diresaun sira iha ministériu nia okos hodi evita prosesu manual sira.
Kona-ba fixa família, TIC TIMOR I.P halo ona enkontru dala rua ho Diresaun Nasional Apoiu Administrasaun Suku (DNAAS) no iha ona prosesu ba dezenvolvimentu aplikasaun ne’e.
Entretantu enkontru refere, hala’o iha salaun Ministériu Administrasaun Estatál.  #MÉDIA TIC#