MAPKOMS APRESIA HO KOOPERSAUN SERVISU RTTL E.P. NO TIC TIMOR I.P. IHA ÁREA TEKNOLOJIA

Ministru Asuntu Parlamentár no Komunikasaun Sosiál (MAPKOMS), Francisco Martins da Costa Pereira Jerónimo, apresia ho kooperasaun servisu entre Rádiu Televizaun Timor-Leste, Empreza Públika (RTTL, E.P.) ho Ajénsia Teknolojia Informasaun no Komunikasaun, sigla português (TIC) TIMOR I.P., ne’ebé sei atualiza informasaun iha baze ho lais liu iha ámbitu kampaña eleisaun prezidensiál tinan 2022, liuhosi liña Fibra Ótika Terrestre (FOT).  

Tuir Ministru katak, RTTL sai hanesan icon ida ba iha Timor-Leste oinsá atu halo kooperasaun di’ak. Tanba ne’e, utiliza liña Fibra Ótika Terrestre (FOT) hodi bele fó sai programa sira hotu ne’ebé up-load ona no bele download iha nasionál liuhosi FOT ne’ebe bele asesu liuhosi tekniku TIC nian iha Munisipiu, holais no laiha limitadu.  

“Ita hahú hosi dijitalizasaun no agora haree fali ba saida maka ita bele utiliza liuhosi liña FOT nian liu-liu TIC TIMOR fó apoiu ba ne’ebé di’ak tebes ho esforsu hirak ne’ebé iha hodi, bele realiza mehi ne’ebé iha maske hasoru difikuldade barak. Atu tama ba eleisaun prezidensiál Governu mós halo esforsu atu bele realiza mehi ne’ebé iha hodi lansa kooperasaun servisu ida ne’e,” nia esplika.  

Governante ne’e mós agradese ba Ajénsia TIC TIMOR ne’ebé bele fasilita servisu iha área informátika nian hodi hafasil servisu RTTL nian.  Agradese ba Autoridade munisípiu sira ne’ebé fó ona fatin ba RTTL atu jornalista sira bele hola parte iha administrasaun munisipál hodi bele uza liña FOT atu bele fasilita hatutan informasaun mai iha nivel nasionál.

“Kooperasaun hanesan ne’e, la’ós agora de’it maibé ba oin nafatin atu bele atualiza informasaun sira ho lalais tanba dala ruma uza internet ne’ebé maka velosidade ladún di’ak maibé ho liña FOT ne’e jornalista sira destakadu bele asesu ba liña iha administrasaun munisipál holais haruka informasaun mai nasionál. Tanba ida ne’e bele fasilita informasaun sira ne’ebé atualiza lalais.  Ho kooperasaun sira ne’e lori RTTL ba oin di’ak liu tan iha futuru hodi bele diversifika,” nia informa.  

Iha fatin hanesan, Diretór Ezekutivu Ajénsia TIC TIMOR I.P., Roberto Caitano de Sousa Vicente hatete nia parte agradese ba RTTL, E.P. tanba bele utiliza ona fasilidade TIC TIMOR nian hodi investe infraestrutura TIC TIMOR nian atu bele hadi’a liu tan prestasaun servisu ba populasaun sira.

Inísiu hosi kooperasaun barak maka halo ho RTTL, E.P. nomós instituisaun sira seluk hodi tenta atu moderniza liu tan área informátika iha instituisaun idak-idak tanba papél TIC TIMOR nian atu haree polítika nomós implementasaun ligasaun ba inisiativa Governu Eletróniku iha área informátika nian, hodi kobre ba instituisaun sira hotu ne’ebé mak hetan atribuisaun hosi OJE.

Ho servisu ne’ebé TIC TIMOR iha hodi ajuda RTTL tanba ne’e, iha longu prazu iha mehi katak, sei fasilita ho servisu ne’ebé maka iha RTTL bele presta servisu ne’ebé maka di’ak liu ba populasaun tomak hahú hosi área rural to’o nasionál inklui internasionál.

Xefe Ezekutivu ne’e afirma katak, iha biban ida ne’e servisu ne’ebé TIC TIMOR oferese ba RTTL atu tulun RTTL liu-liu iha festa Demokrasia ne’ebé sei halo iha semana hira tuir mai tanba ne’e fornese servisu ba RTTL hodi bele garante notísia ne’ebé maka iha nivel munisípiu bele manda lais-liu mai iha nasionál hodi halo publikasaun dereita.   

Iha mos planu ba tempu tuir mai “sei ba to’o iha nivel postu administrativu hodi halo kobertura iha nivel postu. Entaun ida ne’e sei gradualmente no sei to’o iha situasaun ideal ne’ebé maka ita hotu hakarak hodi lori Governu besik liu ba povu, nune’e povo sira bele hetan informasaun lais-liu,” nia informa.

Kontinuasaun hosi koordenasaun ne’e, la-ses hosi MoU ne’ebé maka Ajénsia TIC TIMOR asina ona ho RTTL, E.P. iha tinan kotuk hodi haree ba servisu separasaun hanesan, servisu Email Ofisial, servisu konetividade lokál, apoiu tékniku ba pesoál jornalista sira hosi RTTL, E.P. nian, nomos servisu ba web-hosting.

Ho nune’e RTTL mós hola parte hosi Instituisaun Estadu 48 ona ne’ebé liga mai iha TIC TIMOR ba futuru ita hein katak Instituisaun 100 resin bele ona liga mai iha TIC TIMOR hodi bele kobre no redús kustu ba instituisaun estadu sira hotu.

Entretantu Diretór Ezekutivu mós agradese ba RTTL, E.P., ba konfiansa TIC TIMOR hanesan, tékniku Timor oan ne’ebé iha koñesimentu ne’ebé di’ak tebes hodi fornese solusaun informátika. #MÉDIA TIC#