MAPKOMS KONGRATULA TIC TIMOR I.P IHA ÂMBITU ANIVERSÁRIU BA DATOLUK

Ministru Asuntu Parlamentár no Komunikasaun Sosiál  (MAPKOMS) Francisco Martins da Costa Pereira Jerónimo, kongratula Ajénsia Tecnologia da Informação e Comunicação  (TIC)  TIMOR, I.P ba aniversáriu datoluk nian.

Governante ne’e,  apresia ho dedikasaun TIC TIMOR  nian hahú husi tinan inísiu estabelesimentu to’o halo ona tinan tolu kontribui signifikativu tebes iha prosesu dezenvolvimentu teknolojia no komunikasaun iha Timor-Leste.

“TIC nia prezensa kontribui mós ba estadu atu hadi’a konetividade nasionál, liu husi rede Fibra Ótika Marítima no Terrestre, alende ne’e tulun atu hadi’a governasaun Estadu nian ho hodi  hadi’a servisu públiku sira ne’ebé Governu presta ba ita nia sidadaun sira, atu hadi’a mós ambiente negósiu nian nune’e bele estimula partisipasaun sosiedade no konfiansa públiku nian ba Governasaun”, hatete Ministru MAPKOMS.

Ministru  ne’e mos, kontente ho servisu sira ne’ebé TIC TIMOR  oferese ba MAPKOMS, hanesan, domain no servidór TIC TIMOR nian hodi fasilita Departamentu Peskiza no Analiza Média iha Diresaun Nasionál Diseminasaun Informasaun nia servisu, MAPKOMS nia ekipa sente satisfás tebes tanba iha koordenasaun di’ak tebes ho ekipa téknika TIC  TIMOR.

“Aproveita biban ida ne’e, hakarak husik hela mensajen ida ba TIC TIMOR , ho aniversáriu ba datoluk, ita konsidera, ita sei nurak, maibé ho domina teknolojia no informátika ita bele sai forte hodi duni tuir mundu ninia evolusaun. TIC tenke sai pontu de arranka iha dezenvolvimentu setór infraestrutura bázika sira ne’ebé fundamentais no sai mós hanesan prioridade ida iha Governasaun ida ne’e nian” . Esplika Ministru  #MÉDIA TIC#