MESSK SEI KONTRIBUI BA ESFORSU TIC TIMOR I.P. HODI HAKBESIK GOVERNU BA POVU

Relasiona ho asinatura Nota Entendimentu entre Ajénsia Teknolojia Informasaun no Komunikasaun, sigla português (TIC) TIMOR I.P., no Ministériu Ensinu Superior Siénsia no Kultura (MESSK), sei kontribui ba esforsu TIC TIMOR I.P nian atu hakbesik liu tan Governu ba povu nune’e bele hamenus gastu sira ba iha área Informátika no sentraliza liu tan iha sentru dadus Governu Eletróniku ne’ebé, agora daudaun estabelese iha TIC TMOR.

Tuir Diretór Ezekutivu TIC TIMOR I.P., Roberto Caitano de Sousa Vicente katak, Nota Entendimentu ne’ebé iha, TIC TIMOR I.P hakarak kontribui tebes ba papél importante hosi Ensinu Superior ninian hanesan Ministériu ida ne’ebé matan ba Ensinu Superior sira no promove dezenvolvimentu modernizasaun kualidade kontetividade kona-ba Sistema ensinu Superior no sientífiku Teknolojia nian.

Nia dehan, liu hosi kooperasaun ida ne’e, MESSK kontribui ona ba TIC TIMOR I.P hodi atinje Governu ne’ebé integradu liu simpatizadu liu-liu atinje polítika VIII Governu Konstitusionál nian, TIC TIMOR iha esforsu atu reforma Administrasaun Públika no ida ne’e sei sai faze importante ida ba Implementasaun Governu Eletróniku liu hosi utilizasaun Teknoloija Informasaun no Komunikasaun.

Kooperasaun ne’ebé halo ho MESSK mós hola parte hamutuk ho Ajénsia Estadu sira ne’ebé agora daudaun hahú uza ona servisu informátika ne’ebé fornese hosi TIC TIMOR I.P iha área oioin.

“Karik ita hakarak atu atinje objetivu prinsipál ida hodi sentraliza informasaun Governu nian atu hasa’e nível koordenasaun servisu transparénsia hodi bele atinje ezbosu ne’ebé ligadu ba plataforma administrativa no liu hosi kolaborasaun servisu ida ne’e ita bele hamutuk presta servisu di’ak liu tan ba iha ita nia Públiku,” nia informa.

Iha fatin hanesan, Ministru Ensinu Superior Siénsia no Kultura, Lounginhos dos Santos hato’o agradesimentu profunda ba ekipa ékniku TIC TIMOR no MESSK ne’ebé ho esforsu tomak hahú hosi inísiu hala’o diskusaun no ikus mai bele iha kooperasaun servisu.

Nia esplika, ho akordu ida ne’e bele reforsa polítika MESSK nian oinsá atu moderniza informasaun ida ne’e, atu bele servisu ho profesionalizmu ne’ebé bele garante efetivu no efikasia

“Iha parte seluk divulgasaun informasaun ne’e mós atu bele garante responsabilidade, transparante, publikasaun informasaun Ministériu nian ba Ensinu superior públiku no privadu sira,” tenik nia.  #MÉDIA TIC#