MSSI APOIU AJÉNSIA TIC TIMOR I.P BA KOOPERASAUN SERVISU IHA FUTURU

Diretór Infraestrutura Ajénsia Tecnologia da Informação e Comunicação (TIC) TIMOR I.P André Felix Marques, hamutuk ho ekipa tékniku Ajénsia nian, hasoru malu ho Vice Ministra Solidariedade Sosiál no Inkluzaun (MSSI) Signi Verdial, hodi halo  aprezentasaun kona-ba lala’ok TIC TIMOR I.P nian  liu husi servisu ne’ebé Ajénsia  ne’e halo ona no planu  ne’ebé sei halo.
Iha sorumutu ne’e ,Vice Ministra apoiu servisu TIC TIMOR I.P nian, nune’e iha futuru bele halo kooperasaun servisu ne’ebé di’ak, tanba dala barak servisu ne’ebé halo lalais tenke hein to’o loron rua ka tolu tanba liña internet ne’ebé la’o ladún di’ak iha MSSI.
Nia dehan, Ida ne’e maka presiza, tanba problema boot iha Ministériu hanesan koneksaun rede internet, fó impaktu mós ba sistema freebalance tanba liña internet ne’ebé la’o neineik liu.
Governante ne’e mós agradese, tanba buat ne’ebé durante ne’e sai preokupasaun, relasiona ho rede internet, ikus mai TIC TIMOR I.P bele esplika kle’an no polítikamente sira apoiu tebes.
Iha Biban ne’e mós Diretór Infraestrutura esplika, TIC TIMOR I.P eziste  iha tinan 2017 bazeia ba dekretu lei 29/ 2017 ne’ebé relata diretamente ba Gabinete Primeiru Ministru. TIC TIMOR I.P mós hanesan institutu públiku ida nia baze iha Dili maibé mós necesita iha Munisípiu.
Nia dehan, Ajénsia ne’e lidera husi Diretór Ezekutivu  no nia mandatu ba tinan lima, bele  mós ekstende tan ba períodu ida no iha nia Konsellu Administrativu, hanesan Diretór Ezekutivu, Ministériu Finansas, Ministériu Justisa, Ministériu Interior no Ministériu Transporte no Telekomunikasaun.
Agora dadauk atu implementa ICT Policy no ICT Estrategy kona-ba aplikasaun infraestrutura, inklui mós Fibra Ótika ba rede Nasional. Ajénsia ne’e, sai implementador ba inisiativa governu eletróniku nomós implementa governu ba governu, governu ba sidadaun no governu ba emprezáriu.
Nia informa katak, Ajénsia ne’e halo ona instalasaun rede Fibra Ótika Nasional ho nia objetivu atu kria rede governu nian rasik ba Munisípiu no kobre mós iha Dili, liu husi Oli Pezadu ne’ebé EDTL  halo. Ho nune’e TIC Timor I.P dada tutan husi sub estasaun sira ne’e ba iha Autoridade Munisípiu sira no iha futuru, sira sei sai distributor iha munisípiu idak-idak, hanesan Ministériu sira seluk ne’ebé relevante ba Ajénsia Governu nian iha Munisípiu laran. Vantajen husi projetu ida ne’e atu halo governu la depende ba operadór telekomunikasaun ne’ebé eziste iha TL.
TIC TIMOR I.P mós oferese korreiu eletróniku video conference nomós voice over I.P no rede ida ne’e 100% governu nian, tanba ne’e sei la depende ba operadór sira ne’ebé maka iha,  nune’e bele asegura segredu governu nian. Ida ne’e hanesan infraestrutura báziku atu implementa governu eletróniku, alende ne’e, nia mós prontu atu dada kabu sub mariñu mai iha ne’e.
TIC TIMOR I.P mós halo ona koneksaun ba liña Ministériu balun hanesan MOP, MS, MNEK, MRLAP no GPM.  #Média TIC#