ORSAMENTU AJÉNSIA TIC TIMOR I.P. BA TINAN 2022, PASA IHA DISKUSAUN ESPESIALIDADE HO VOTUS AFAVOR 45

Diretór Ezekutivu Ajénsia Teknolojia Informasaun no Komunikasaun, sigla português, (TIC) TIMOR I.P., Roberto Caitano de Sousa Vicente, hamutuk ho Diretora Administrasaun no Finansas, Maria da Frosa Marques no ekipa legal sira, akompaña direta diskusaun espesialidade ba orsamentu TIC TIMOR I.P., nian iha uma fukun Parlamentu Nasional.

Liuhosi diskusaun espesialidade ne’e, ikus mai orsamentu TIC TIMOR I.P., nian pasa ho votus afavór 45 kontra 0 no abstensaun 15.  Total orsamentu Ajénsia TIC TIMOR I.P $ 4,733,971.00 iha kategoria saláriu no vensimentu 0, bens de servisu $ 3,669,791 kapitál menór $  1,064,180.00, kapitál dezenvolvimentu 0 no transferénsia públika 0.

 Iha orsamentu ne’e rasik, iha  proposta 129 aneksu tabela orsamentál 3 despeza órgaun servisu administrasaun sentrál iha títulu TIC TIMOR I.P., kategoria despeza bens servisu programa 252 telekomunikasaun dotasaun inisiál kategoria $ 953.979 alterasaun aumenta orsamentu adisional, $ 1,619 .945 dotasaun final ba kategoria $ 2,573.914. dotasaun inisiál ba total kategoria despeza $3.669.791 dotasaun final ba total kategoria despeza $ 5,289.736.

Iha diskusaun refere, Deputada Olinda Guterres hosi banka KHUNTO hato’o ninia deklarasaun katak, TIC TIMOR I.P., nu’udar institutu públiku iha área Teknolojia Informasaun no Komunikasaun ho nia natureza jurídiku autonomia Administrativa finanseira no patrimóniu haktuir iha dekretu lei númeru 29/2017 nune’e mós estruturalmente TIC TIMOR tutela ba Primeiru Ministru ne’ebé presta servisu Teknolojia Informasaun no Komunikasaun.

Objetivu hosi proposta refere, bazeia ba audénsia públika hatama adisionál katak, presiza duni aumenta orsamentu ba TIC TIMOR I.P., ba programa 252 ba telekomunikasaun ho razaun, atu halo kontinuasaun ba fornesimentu liña internet ba Governu. Iha proposta adisional ne’e, atu selu dívida iha tinan 2022 ba projetu sira ne’ebé, seidauk finaliza tanba impaktu hosi pandemia COVID-19 no halo kontinuidade hosi servisu internet ne’ebé, liga ba instituisaun estadu sira iha nivel nasionál no munisipál inklui kobertura direta hosi RTTL ba iha eleisaun prezidensiál iha tinan 2022. Orsamentu ida ne’e mós atu kria fasilidade karik iha futuru Governu iha planu atu dada kabu submarinu mai iha Timor-Leste nune’e mós atu kria fasilidade ne’ebé importante ba liña kabu submarinu mai Timor-Leste.

Entretantu orsamentu Ajénsia TIC TIMOR I.P nian, ba tinan 2022 hetan ona aprovasaun inklui proposta adisional ho montante $ 6,353,916. #MÉDIA TIC#