PN HUSU TIC TIMOR I.P ATU FÓ APOIU CO-LOCATION NO KONETIVIDADE

Diretór Komunikasaun no IT Parlamentu Nasional (PN), Helio Leite Magalhães, husu atu Ajénsia Tecnologia da Informação e Comunicação (TIC) TIMOR I.P atu fasilita Co-Location no Konetividade ba Parlamentu Nasional (PN) tanba durante ne’e sira hasoru difikuldade iha área refere.

Enkontru entre ekipa TIC TIMOR I.P ho ekipa IT Parlamentu Nasional ne’e bazeia ba pedidu ne’ebé IT PN hato’o ba TIC TIMOR I.P hodi  hatene fasilidade ne’ebé mak TIC iha liga ho área Teknolojia nomos planu TIC nian ba iha 2021 nian.

Diretór Helio informa katak, TIC hanesan Ajénsia estadu ne’ebé haree kona-ba área teknolojia nian ho nune’e Instituisaun Estadu hotu presiza utiliza saida mak estadu investe ona.

“Ita hotu hatene katak TIC hanesan Ajénsia Estadu nian ne’ebé haree oinsá atu jere teknolojia informasaun ninian, ida ne’e ba ami sente diak tebes atu iha koordenasaun servisu ho TIC hodi buat ne’ebé iha ona ita bele aproveita hodi nune’e ba oin ita iha investimentu ne’ebé hanesan,”

Entretantu Diretór ne’e mós informa tan katak, PN iha Data Center maibé la garante ho kondisaun data center ne’ebé sei uza kobe house ho kestaun hirak ne’e mak presiza tebes atu hatene kona-ba TIC tanba durante ne’e ekipa IT PN preokupa liu ho ninia funsionamentu ne’ebé lao la diak, tanba iha difikuldade ba iha backup no sistema aplikasaun nian hanesan DNS, MAIL no Web Server, ho preokupasaun hirak ne’e mak husu atu TIC fahe ninia fasilidade sira hodi oinsá mak bele haree oportunidade hirak ne’e atu halo backup hodi fornese ba Parlamentu. Ho nune’e mak IT PN buka meius oinsá mak bele haree alternativa seluk hodi asegura  ekipamentu sira ne’e tanba ekipamentu ne’e iha investimentu ne’ebé boot.

Tanba durante ne’e IT Parlamentu observa  TIC nia atividade lubun ida ne’ebé mak fornese ona ba Ministériu sira liuliu oinsá atu halo backup ba liña nomos bele fasilita Ministériu sira.

Alende ne’e, Diretór Infraestrutura Ajénsia TIC TIMOR I.P, Andre Felix Marques hato’o agradesimentu ba ekipa IT Parlamentu tanba fó fiar hodi servisu hamutuk ho TIC.

“Atu hateten de’it katak, ami hato’o agradese tanba fó fiar ona mai TIC, agora daudaun fasilidade ne’ebé mak TIC iha hanesan, hosting, aplikasaun, Website, DNS inklui mós Email iha TIC TIMOR ninia data center rasik” Diretór Andre informa.

Diretór Andre esklarese tan katak, iha Ministériu lubun hira ona mak nia Website, Aplikasaun, DNS hosting iha TIC ninian Data Center inklui Email sira, agora daudaun TIC TIMOR mós iha konetividade to’o iha munisípiu 12 ne’ebé termina iha administrasaun munisípiu nia fatin hanesan distribution point no fase tuir mai mak sei fahe fali ba Instituisaun Estadu sira seluk ne’ebé iha munisípiu ne’ebé sei liga ba administrasaun munisípiu nia fatin hodi nune’e iha nasionál bainhira asesu ba freebalance ho rede lokal la presiza internet.

Diretór ne’e mós informa ba ekipa IT Parlamentu katak, ninia parte tékniku garante katak durante oras servisu  sei garante atu labele hetan difikuldade iha oras servisu nian  no sabadu ho domingu mós sei halo monitorizaun hanesan ba server, jaringan, aplikasaun sira lao ka lae, konetivade ba munisípiu iha ne’ebé mak ahi mate, fiu kotu ami sei monitorin hotu iha 24 oras tanba ami mós iha pessoal kada ema ida iha  munisípiu ne’ebé sei apoiu bainhira iha problema urjente ruma.

Bainhira remata sorumutu, ekipa tékniku TIC TIMOR mós hala’o vizita ba Data Center Parlamentu Nasional no kontinua akompaña Diretór Komunikasaun no IT PN ho  ninia ekipa kontinua hala’o vizita  Data Center TIC TIMOR I.P nian iha Palacio Governu.#MÉDIA#TIC