PNDS HAHÚ MUDA NIA RACK SERVER MAI DATA CENTER TIC TIIMOR I.P

Ekipa Programa Nasional Dezenvolvimentu Suku (PNDS) hahú muda sira nia Rack Server Fízika mai data center Ajénsia Tecnologia da Informação e Comunicação (TIC) TIMOR I.P. Server refere  iha rua maibé ida muda ona no ida seidauk muda tanba oras ne’e dadauk sira sei uza hela, tanba sira nia sistema baze de dadus iha hela Server ne’e nia laran.

Objetivu husi mudansa ne’e,  atu ajuda PNDS tanba antes ne’e, funsionáriu PNDS iha Munisípiu atu hatama dadus ba sistema tenke mai iha nasionál maibé bainhira  ligasaun TIC TIMOR nian ba edifísiu PNDS iha ona, maka dadus  hirak ne’e la presiza lori mai Dili maibé bele hatama iha sistema baze de dadus, iha munisípiu idak-idak.

Tuir Tékniku Infraestrutura TIC TIMOR I.P, Henrique Fulgêncio Guterres katak, Rack Server ida muda ona mai data center TIC TIMOR nian no ida seidauk muda maibé tuir planu iha loron 30 fulan Agostu maka lori mai, baihira sira halo teste munisípiu nian la’o hotu ona.

Entretantu Tékniku ne’e esplika, koneksaun ida husi TIC TIMOR I.P nian ba Head Quarter ida iha Dili ne’e, nia koneksaun di’ak tebes no hein monta sira nia ekipamentu rede nian ba iha ne’ebá no bainhira hotu, sira bele asesu ona internet. # Média TIC#