PROGRESU EZEKUSAUN ORSAMENTU AJÉNSIA TIC TIMOR I.P ATINJE 84,10%

Diretora Administrasaun no Finansas, Ajénsia TIC TIMOR I.P, Maria da Frosa H. Marques, informa iha tinan ida ne’e, TIC TIMOR I.P, hahú jere rasik nia orsamentu no iha tinan ne’e, ekipa Divizaun Administrasaun no Finansas (DAF) hamutuk ho ekipa seluk konsege servisu makaas hodi dedika sira nia aan tomak ba halo servisu ida ne’e, maske iha situasaun COVID-19 maibé DAF hamutuk ho ekipa konsege atinje ezekusaun ho porsentu 84,10%.

“Ida ne’e, brillante tebes hanesan Ajénsia ida foin tinan primeiru ezekuta rasik nia orsamentu husi persentajen ne’ebé iha, la’ós mai husi projetu kiik maibé ita iha projetu ne’ebé tama iha kategoria boot iha ICB 4 NCB ida ho RFQ ne’ebé hamutuk 20,” esplika Diretora Administrasaun no Finansas. 

Diretora ne’e esplika, Divizaun Administrasaun no Finansas hanesan, parte ida ne’ebé importante tebes iha setór públiku no setór privadu ho nune’e, Ajénsia TIC TIMOR hanesan parte husi setór públiku tanba ne’e Administrasaun no Finansas ho nia servisu prinsipál atu ezekuta no jere jestaun finanseira TIC TIMOR nian ho efikás, efisiénsia no transparénsia haktuir ba lei ezekusaun orsamentu ne’ebé aplika iha Timor-Leste.

Servisu prinsipál seluk husi Divizaun Administrasaun no Finansas maka hanesan, kada tinan proposta orsamentu ba Governu no ba Parlamentu Nasionál hafoin hetan aprovasaun foin sei ezekuta.

Ho nune’e funsaun dahuluk husi DAF maka, atu ezekuta planu sira ne’ebé hetan ona aprovasaun no oinsá garante bainhira halo prosesu ezekusaun tuir padraun estandarte ezekusaun internasionál ne’ebé Timor-Leste adapta.

“Iha DAF rasik, iha ekipa ne’ebé iha hanesan, finansas, accounting, procurement, lojístika, média ,arkivu no front desk, entaun kompostu husi ekipa boot ne’e, DAF suporta Divizaun sira seluk inklui gabinete hodi bele halo servisu operasionál sira la’o ho di’ak. DAF mós halo relatóriu trimestral no presiza submete iha sistema Dalan ba Futuru (DBFT) iha relatóriu ne’ebé maka importante submete ba kontabilidade (DNCNC) iha Ministériu Finansas (MF) hanesan fluxo da caixa (cash flow), relatóriu rekonsiliasaun bankária no relatóriu ezekusaun trimestral,” dehan nia.

Entretantu, DAF nia servisu tenke hatene oinsá atu ezekuta orsamentu ho di’ak, loloos no tuir regra tanba bainhira DAF iha fallansu, sei fó impaktu ne’ebé boot tebes ba superior sira ne’ebé halo desizaun.   #MÉDIA TIC#