PROPOSTA OJE TINAN 2021 TIC TIMOR SEI TAU PRIORIDADE BA DEZENVOLVIMENTU APLIKASAUN

Bazeia ba proposta Orsamentu Jerál Estadu (OJE) tinan fiskál 2021, Ajénsia Tecnologia da Informação e Comunicação (TIC) TIMOR I.P, tau nafatin prioridade ba dezenvolvimentu aplikasaun dijitál ba iha instituisaun estadu sira atu fó solusaun liga ba aplikasaun iha âmbitu Governu Eletrôniku tanba hakarak hakbesik Governu ba iha povu, ne’ebé maka dijitalizadu hodi bele fó apoiu di’ak liu tan ba sidadaun nomós ba setór privadu sira.

“Instituisaun xave sira maka hanesan SERVE I.P. tanba sira fó lisensa barak ba empreza sira maibé bele hahú muda no sira bele manda dokumentu liu husi email maibé ba oin dijitaliza hotu plataforma sira ne’e atu nune’e bele submete liu husi sistema online de’it,” dehan Diretór Ezekutivu TIC TIMOR I.P, Roberto Caitano de Sousa Vicente, ba média PN hafoin halo audénsia publika ho komisaun E Parlamentu Nasional ne’ebé trata asuntu infraestrutura no telekomunikasaun, iha sala komisaun PN.

Iha parte seluk hanesan, Ministériu Komérsiu no indústria (MKI) presiza fó mós apoiu ba sira atu dijitaliza sistema tanba sira mós fó apoiu ba sidadaun nomós setór privadu sira inklui Ministériu Administrasaun Estatál (MAE) atu prioritiza ba sistema fixa família tanba durante ne’e laiha informasaun klaru kona-ba sidadaun.  Dala barak apoiu ne’ebé Governu fó la to’o, nune’e presiza atu dijitaliza sistema informátika Governu nian atu bele fó atendementu di’ak liu tan ba sidadaun sira.

Iha biban ne’e, Xefe Ezekutivu informa, proposta orsamentu ba tinan 2021 ne’ebé iha ho montante $ 4,014802,00 ne’ebé fahe ba kategoria rua maka hanesan bens servisu no kapitál menór ne’ebé bazeia ba programa rua maka hanesan, Teknolojia informasaun no komunikasaun (Governu Eletrôniku) inklui boa Governasaun no jestaun institusionál. Ba bens de servisu aloka montante por volta $2 milloens no kapitál menór ho montante $1 millaun resin.

Nia esplika atu atinje ida ne’e, tenke iha infraestrutura ba iha sentru dadus ne’ebé maka di’ak tanba ne’e maka prioridade tinan oin ida maka atu hadi’a sentru dadus Governu Eletrôniku iha Ajénsia TIC TIMOR atu nune’e bele fó solusaun liu husi plataforma dijitál ba instituisaun estadu tomak.

“Ami hato’o difikuldade ne’ebé Ajénsia iha, tanba iha programa importante ida ba ami ne’ebé sai prioridade no urjente atu mellora ami nia sentru dadus Governu Eletrôniku nomós haree estudu atu harii sítiu ida atu bele rekoopera husi dezastre maibé orsamentu ne’ebé maka aloka iha OJE ba tinan 2021 ne’e korta tiha husi MF ho montante $ 3 milloens resin entaun difikulta Ajénsia atu atinje objetivu ne’ebé iha,”tenik nia.

Entretantu partisipa iha audénsia ne’e maka Ajénsia autónomu sira  inklui TIC TIMOR I.P. #MÉDIA TIC#