REDE INTERNET LENTU IHA MUNISÍPIU, AJÉNSIA TIC TIMOR FÓ ONA SOLUSAUN REDE LOKÁL LIU HOSI FOT

Relasiona ho rede internet ne’ebé lentu  iha nível munisipál, oras ne’e dadauk Ajénsia Teknolojia Informasaun no Komunikasaun sigla português (TIC) TIMOR I.P fó ona solusaun rede lokál liu hosi Kabu Fibra Ótika Terrestre (FOT) Governu nian iha munisípiu 12.

Tuir Diretór Ezekutivu Interinu Ajénsia TIC TIMOR I.P., Justo Fernandes katak, rede ne’ebé TIC TIMOR fornese to’o iha munisípiu sira atu fó solusaun lokál no laiha relasaun ho internet tanba ida ne’e, parte servisu hosi Governu Eletróniku ne’ebé primeiru haree ba infraestrutura teknolojia oinsá Governu lokál bele asesu servisu ne’ebé hosting iha nasionál ezemplu hanesan sistema finanseiru Freebalance.

“Antes ne’e internet lentu loos atu halo pagamentu ida lori tempu to’o oras ida liu-liu asesu ba sistema Freebalance maibé ho asesu rede lokál liu hosi FOT funsionáriu sira hosi munisípiu la presiza mai nasionál hodi asesu ba sistema ne’e maibé bele iha de’it idak-idak nia edifísiu hodi halo pagamentu liu hosi sistema ne’e,” dehan Diretór Ezekutivu Interinu ba RTTL, iha sala enkontru PCM Palásiu Governu .

Nia dehan ida ne’e, fundamenta atu estabelese ligasaun lokál hodi bele asesu ba sistema freebalance. alende ne’e, iha munisípiu asesu lokalmente ba iha sistema Dalan ba Futuru (DBFT), sistema ne’ebé monitoriza ezekusaun orsamentu estadu ninian.

Xefe Ezekutivu Interinu ne’e, realsa liu tan katak Problema internet ne’ebé enfrenta iha nasionál nomós iha munisípiu lentu liu no karun liu tanba ne’e Governu asina ona kontratu relasiona ho Fibra Ótika Kabu Sub Mariñu ne’ebé ho velosidade aas no sei  ajuda instituisaun Governu sira to’o iha baze oinsá bele asesu rekursu teknolojia sira liu hosi internet no liu hosi intranet tanba ne’e bainhira internet laiha mós sei bele asesu lokalmente. #MÉDIA#TIC