SEII GARANTE AKORDU SERVISU HO TIC TIMOR I.P. SEI FASILITA SERVISU INFORMÁTIKA

Sekretária Estadu Igualdade no Inkluzaun (SEII) Maria José da Fonseca de Jesus, afirma ho akordu servisu ne’ebé SEII halo ho Ajénsia TIC TIMOR I.P., sei fasilita servisu informátika hodi hakat ba implementasaun Governu Eletróniku.

“Akordu ne’ebé parte rua halo hakat ba Governu Eletróniku ba oin atu halo konetividade ba atividade entre instituisaun Governu sentrál no munisípiu sira atu hafasil servisu,” dehan Sekretária Estadu Igualdade no Inkluzaun iha ámbitu asinatura Nota Entendimentu ho TIC TIMOR, iha sala reuniaun SEII Kaikoli.

Nia dehan, liu hosi Teknolojia Informasaun komunikasaun ne’ebé TIC TIMOR apoiu sei bele fasilita liu tan komunikasaun.  

“Ha’u fiar katak, apoiu ne’e bele ajuda ami hahú hosi nasionál to’o iha baze liu-liu fasilita ami nia pontu fokál sira iha munisípiu no postu administrasaun sira halo komunikasaun, hafasil servisu no komunikasaun ne’ebé sei halo ba oin,” nia informa.

Iha fatin hanesan, Diretór Ezekutivu Ajénsia TIC TIMOR I.P., Roberto Caitano de Sousa Vicente hateten, akordu ne’ebé asina entre TIC TIMOR ho SEII haree liu kona-ba apoiu prinsipál atu mellora liu tan sira nia konetividade internet iha edifísiu SEII nomós to’o iha munisípiu no apoiu segundu sei haree liu kona-ba estabelesimentu servisu báziku sira hanesan, apoiu ba kriasaun email, website, ne’ebe hanesan faze primeiru.

Tanba faze tuir mai atu haree mós baze de dadus liu-liu servisu SEII nian ne’ebé ba oin sei iha kooperasaun ne’ebé maka barak liu, oinsá buka dalan hodi apoiu SEII atu bele hahú presta sira nia servisu di’ak liu tan ba sidadaun liu-liu ba feto sira.

“Iha instituisaun kuaze 47 ona, inklui mós autoridade munisípiu sira liu hosi MAE hetan fornesimentu ba liña intranet hosi TIC TIMOR hotu, segundu haree kona-ba PNDS sira iha munisípiu 12 hetan ona apoiu hosi TIC TIMOR no sira nia ekipamentu mós rai hotu iha sentru dadus TIC TIMOR nian no seidauk sura ho instituisaun sira seluk hanesan ministériu boot sira ne’ebé hahú utiliza ona servisu TIC TIMOR nian” nia esplika.

Xefe Ezekutivu ne’e esplika, efetivamente bainhira asina ona akordu MoU ne’e, ofisializa akordu refere hodi bele utiliza no hahu servisu variante sira ne’ebé TIC TIMOR fornese hanesan dezenvolve aplikasaun sira, dezenvolve website, email ofisiál, jestaun rekursu umanu nian no seluk tan. 

“To’o agora ita kontribui ona ba poupansa orsanmentu jerak estadu kuaze $ 45 milloens hosi kustu internet nomós servisu aplikasaun sira, Ajénsia nia prontidaun agradese ba SEII tanba iha inisiativa atu asuntu hirak ne’e, loloos ami maka mai halo aprezentasaun maibé realidade hosi SEII nian maka komesa ona foti inisiativa hodi foti asuntu ne’e, hodi hafasil servisu,” nia salienta.  #MÉDIA TIC#