SISTEMA FREEBALANCE LA’O DI’AK HAFOIN KONEKSAUN REDE FOT IHA MUNISÍPIU LIQUIÇA

Hafoin koneksaun rede Fibra Ótika Terrestre FOT ne’ebé zere husi Ajénsia Teknologia da Informação e Comunicação TIC TIMOR iha Munisípiu Liquiça, Sistema Freebalance la’o ho di’ak tanba ho koneksaun rede internet ne’ebé la’o lais.
 
Sekretáriu Autoridade Munisípiu Liquiça Renato Neves iha entrevista hatete, agora dadauk preparasaun ba desentralizasaun tanba ne’e sistema freebalance, iha inísiu problema boot maibé foin ezisténsia rede FOT ne’ebé fornese husi TIC TIMOR I.P ba Munisípiu, sistema sira hahú funsiona ho di’ak.
 
Iha biban ne’e nia mós husu ba Ajénsia, atu bele inklui mós tékniku sira husi Postu Administrativu hodi tuir formasaun kona-ba informátika. 
 
Alende ne’e nia mós husu, kona-ba rede rua ne’ebé eziste iha Munisípiu sai konfuzaun ba sira tanba rede hirak ne’e mai husi Governu hotu.
 
Hatán ba ida ne’e, Diretór Infraestrutura TIC TIMOR I.P, André Felix Marques hatete, Kona-ba rede rua ne’ebé iha, Governu nian hotu ida husi Ministériu Transporte Telekomunikasaun MTK no ida maka husi TIC TIMOR I.P ne’ebé nia papél aprova husi Parlamentu Nasional (PN) no idak-idak ho nia dekretu lei ne’ebé kuaze atu hanesan.
 
Tanba ne’e, iha duplikasaun servisu maibé hahú halo ona diskusaun oinsá integra instituisaun rua ne’e sai ida de’it nune’e labele hamosu konfuzaun ba kliente sira.
 
Kona-ba treinamentu, Diretór hatete, ida ne’e tama iha planu servisu TIC TIMOR  nian tanba ne’e  Ajénsia sei fó konvite ba  tékniku sira nune’e bele tuir formasaun tanba iha futuru sei iha posibilidade hodi liga  liña FOT ba Postu Administrativu sira.  
 
Husi TIC TIMOR husi parte infraestrutura, objetivu atu hatene liu tan oinsá servisu ne’ebé Ajénsia oferese durante ne’e liu husi kolaborasaun servisu no koneksaun rede Fibra Ótika.
 
Durante hala’o vizita ba Munisípiu Liquiça, tékniku sira mós halo ligasaun fiu ba printer sira ne’ebé iha Munisípiu liu husi liña FOT. # Média TIC#