TÉKNIKU TIC TIMOR I.P. FASILITA TREINAMENTU JESTAUN ADMINISTRASAUN WEBSITE BA FUNSIONÁRIU HOSI ANATL

Tékniku Ajénsia Teknolojia Informasaun no Komunikasaun, sigla português (TIC) TIMOR I.P., liu hosi Divizaun Dezenvolvimentu Sistema Aplikasaun (DSA), fasilita treinamentu kona-ba jestaun administrasaun ba website ne’ebé dezenvolve hosi TIC TIMOR I.P. ba funsionáriu na’in neen hosi Air Navigation Administration Timor-Leste (ANATL).

Iha abertura ba treinamentu refere, Diretór DSA TIC TIMOR I.P., Justo Fernandes hatete, ekipa tékniku sei fahe informasaun ba ekipa hosi ANATL ida ne’e, hanesan prosedimentu normal ne’ebé hosi parte TIC TIMOR fornese.

Nia dehan treinamentu ne’e, la’ós rohan ba apoiu tékniku ne’ebé, TIC TIMOR fó maibé ida ne’e, hanesan etapa daruak hosi dezenvolvimentu no hafoin treinamentu ne’e remata, sei entrega website refere ba ANATL no responsabiliza ba nia konteudu.

“Kona-ba apoiu téknika TIC TIMOR maka sei responsabilidade no halo manutensaun oinsá haree sistema portal atu nune’e bele ativa 24 oras nia laran nune’e ANATL bele asesu no parseiru sira bele asesu hodi hatene informasaun ba aviasaun iha rai laran,” dehan nia.  

Iha fatin hanesan, Diretora Servisu Tráfiku Aero Navegasaun, Filomena da Costa hatete, sira nia parte sei konvida TIC TIMOR hodi halo site visit liu-liu iha área tékniku Navegasaun no seluk tan atu nune’e TIC TIMOR mós bele hatene lala’ok servisu iha ANATL no bele suporta di’ak liu tan.

Tanba durante ne’e, ANTL laiha website no email ofisiál foin estabelese tanba ne’e, TIC TIMOR nia prezensa bele ajuda ANTL hodi fasilita lala’ok servisu.

Entretantu treinamentu ne’e, hala’o durante loron tolu, iha edifísiu ANATL Komoro. #Média TIC#