TÉKNIKU TIC TIMOR I.P HALO APREZENTASAUN TOPOLOGY BA PREZIDENTE KFP HO NIA EKIPA

Tékniku husi Divizaun Infraestrutura Ajénsia Tecnologia da Informação e Comunicação ( TIC) TIMOR I.P, halo aprezentasaun Topology and Budge Planning  ba Prezidente Komisaun Funsaun Públika (KFP), Faustino Cardoso Gomes ho nia ekipa, iha salaun  KFP Matadoru Dili.

Objetivu husi aprezentasaun Topology and Budge Planning ne’e,oinsá atu integra koneksaun KFP nian ba TIC TIMOR hodi kompleta servisu eletróniku ne’ebé ho nia koneksaun lokál. Servisu sira ne’e maka hanesan, Video Conference, VoIP, sistema SIGAP no SIGAPNET, no seluk tan.

Tuir Tékniku TIC TIMOR, Henrique Fulgencio Guterres katak,  padraun ne’ebé  TIC TIMOR iha,  antes atu halo ligasaun direta liu husi liña Fibra Ótika baibain TIC TIMOR halo levantamentu dadus atu nune’e bele hatene ekipamentu saida maka iha ona no ekipamentu ne’ebé maka sei falta nune’e bele hadi’a liu tan kooperasaun  servisu entre KFP no Ajénsia TIC TIMOR.

Ho nune’e Prezidente KFP hatete, Timor-Leste iha vizaun governasaun eletróniku ne’ebé tenke avansa no ba oin KFP sai núkleu iha prosesu jestaun rekursu umanu nian tanba ne’e, maka KFP iha vizaun atu oinsá dezenvolve di’ak liu tan no iha hanoin ida oinsá sistema ne’ebé dezenvolve ne’e na’in maka KFP no bele funsiona liu husi TIC TIMOR.

Nia parte mós husu ba tékniku husi parte rua ne’e, atu aselera lalais koneksaun ne’e atu bele fasilita servisu KFP nian no oinsá bele integra mai sentru dadus TIC TIMOR I.P. #MÉDIA TIC#