TEKNÍKU TIC TIMOR I.P. FÓ-APOIU TREINAMENTU UTILIZASAUN FORMULÁRIU ELETRÓNIKU BA FUNSIONÁRIU MTCI DESTAKADU IHA MUNISÍPIU LIKISÁ

LIKISA, loron-25, fulan-Outubru, tinan-2021

Tékniku Dezenvolvimentu Sistema Aplikasaun (DSA) Ajénsia Teknolojia Informasaun no Komunikasaun (TIC) TIMOR I. P. fó-apoiu ba ekipa tékniku pesoál Ministériu Turizmu Komérsiu no Indústria (MTCI) liuhosi Diresaun Nasional Peskiza no Estatístika (DNPE), fó-treinamentu utilizasaun formuláriu eletróniku ba funsionáriu MTCI destakadu iha munisípiu Likisá.

Prezensa tékniku TIC TIMOR I.P. nian iha treinamentu ida-ne’e atu observa direta oinsá tékniku MTCI fó-treinamentu ba funsionáriu destakadu hirak ne’e, iha difikuldade ruma ne’ebé sira hasoru karik, ekipa TIC TIMOR I.P. sei hamutuk hodi rezolve fallansu hirak-ne’e tanba antes ne’e tékniku TIC TIMOR I.P. fó ona treinamentu kona-ba kobotoolbox ba ekipa DNPE.

Xefe Departamentu Base de Dadus, Diresaun Nasionál Peskiza no Estatístika (DNPE), Maria Lucia Trindade hateten, Treinamentu ida-ne’e atu aumenta koñesimentu funsionáriu Ministériu Turizmu Komérsiu no Indústria (MTCI) nian, ne’ebé destakadu iha munisípiu sira oinsá atu utiliza formuláriu eletróniku bainhira hala’o servisu.  

“Formasaun ida-ne’e ninia objetivu atu kapasita pesoál funsionáriu Ministériu Turizmu Komérsiu no Indústria (MCTI) ne’ebé destakadu iha munisípiu Likisá hodi bele utiliza formuláriu eletróniku bainhira rekolla dadus iha terrenu” dehan xefe Departamentu ne’e.

Xefe ne’e akresenta katak hosi treinamentu ida-ne’e nu’udar parte importante ida, ne’ebé ho objetivu jerál atu promove Governu eletróniku.

Iha fulan-jullu liubá, tékniku Ministériu Turizmu Komérsiu no Indústria (MCTI) liuhosi Diresaun Nasionál Peskiza no Estatístika (DNPE) halo akordu ho TIC TIMOR kona-ba estabelesimentu sistema kobotoolbox hosi akordu ne’e ho ninia objetivu atu promove Governu eletróniku, hosi sistema ida-ne’e atu aprende mekanizmu rekolla dadus, oinsá atu hatama dadus relasiona ho atividade departamentu nian, uza sistema ida-ne’e atu bele foti dadus ho lais liu iha terrenu.

Iha biban ida-ne’e, xefe ne’e mós la haluha hato’o agradesimentu ba ekipa tékniku TIC TIMOR I.P. liuhosi Divizaun Dezenvolvimentu Sistema Aplikasaun (DSA) ne’ebé fó ona apoiu másimu iha treinamentu ida-ne’e.

“Presiza tebes apoiu hosi TIC TIMOR I.P. atu akompaña ekipa MTCI iha formasaun ne’e tanba iha parte ida, DNPE mós rekoñese katak iha fallansu tékniku balu, ne’ebé maka DNPE presiza duni apoiu hosi TIC TIMOR liga ho utilizasaun sistema kobotoolbox” Informa xefe departamentu ne’e.

Iha fatin hanesan, Diretór Rejionál Munisípiu Likisá, Salvador Serrao dos Santos, hateten, agradese tebes ba treinamentu ne’e tanba durante tinan barak la iha treinamenu kona-ba Governu eletróniku iha sira-nia edifísiu, treinamentu ne’ebé hala’o ne’e bele loke funsionáriu sira-nia hanoin no koñesimentu oinsá atu prienxe formuláriu sira-ne’e, dehan Diretór ne’e.

Treinamentu ne’e hala’o durante semana ida iha edifísiu MTCI iha Munisípiu Likisá ho totál pesoál ualu (8) no ramata ho fahe sertifikadu. #Media TIC