TEKNÍKU TIC TIMOR I.P. KONTINUA AKOMPAÑA EKIPA MTKI FÓ-TREINAMENTU UTILIZASAUN FORMULÁRIU ELETRÓNIKU BA FUNSIONÁRIU MTKI DESTAKA IHA MUNISÍPIU KOVALIMA

Tékniku Ajénsia Teknolojia Informasaun no Komunikasaun (TIC) TIMOR I.P. liuhosi Divizaun Dezenvolvimentu Sistema Aplikasaun (DSA) kontinua halo akompañamentu ba ekipa tékniku hosi Ministériu Turizmu Komérsiu no Indústria (MTKI) liuhosi Diresaun Nasionál Peskiza no Estatístika (DNPE), ne’ebé fó-treinamentu kona-ba utilizasaun formuláriu eletróniku ba funsionáriu MTKI ne’ebé destaka iha munisípiu Kovalima.

Tékniku TIC TIMOR I.P. nia prezensa iha treinamentu ida-ne’e atu observa direta oinsá tékniku MTKI fó-treinamentu ba funsionáriu destakadu sira, bainhira hetan difikuldade tanba antes ne’e, tékniku TIC TIMOR I.P. fó ona treinamentu kona-ba kobotoolbox ba ekipa DNPE.

Iha treinamentu formuláriu eletróniku ne’e, Xefe Departamentu Peskiza MTKI, Henrique Araújo Carlos hateten, atividade ne’e, hala’o tanba MTKI servisu hamutuk ho TIC TIMOR I.P. liuhosi asina MoU iha fulan-Jullu liubá atu nune’e, TIC TIMOR I.P. bele fasilita funsionáriu MTKI tanba sistema Kobotoolbox ne’ebé oferese hosi TIC TIMOR atu aumenta hodi kontribui ba Governu Eletróniku.

Objetivu hosi formasaun ida-ne’e atu funsionáriu MTKI iha nasionál nomós munisípiu bele hala’o programa sira-ne’e, instituisaun jerál sira iha programa rekolla dadus karik, la presiza no munisípiu maibé prepara de’it nia formuláriu hodi halo tuir nesesidade. Ida-ne’e mak akordu ne’ebé MTKI ho TIC TIMOR halo.

Iha fatin hanesan, reprezentante hosi partisipante sira agradese ba TIC TIMOR I.P., no MTKI tanba liuhosi programa ida-ne’e, bele fasilita funsionáriu sira iha munisípiu bainhira asesu ba dadus ruma.

“Treinamentu ne’e, mak ami presiza duni tanba iha oportunidade ida-ne’e hodi suporta funsionáriu sira iha munisípiu hodi fasilita ami-nia servisu,”

 Treinamentu ne’e, hala’o durante semana ida no iha biban ne’e hala’o mós treinamentu iha munisípiu Manufahi.

Entretantu  sei iha treinamentu tuir mai ne’ebé sei hala’o iha munisípiu Bobonaru no Ainaru. Antes ne’e, ekipa hala’o uluk ona treinamentu iha munisípiu Baukau no Likisá. #MEDIA TIC#