TIC TIMOR DEZEÑU ONA PORTAL ÚNIKU HO PORSENTU 80

Diretór Ezekutivu Ajénsia Tecnologia da Informação  e Comunicação (TIC) TIMOR I.P, Roberto Caitano de Sousa Vicente hetan entrevista husi média Ajénsia TATOLI hodi informa katak, TIC TIMOR halo ona dezeñu ba portal úniku ne’ebé atinje ona porsentu 80.
Objetivu husi dezeñu portal úniku, atu Ministériu hotu-hotu   iha portal ida de’it, nune’e bele asesu ba servisu hotu ne’ebé estadu investe.
“Iha portal ne’e ezemplu lembra de’it website nia naran ida de’it bele haree website ministériu sira seluk tanba agora dadauk tenke buka ida-ida”, dehan Xefe Ezekutivu ba TATOLI iha Edifísiu TIC TIMOR Palácio Governo.
Nia dehan, dezeñu ne’e,  hahú tama ona 80% hein katak iha tinan 2019 nia laran bele konklui no bele dehan governu iha portal úniku husi asesu ba kualkér servisu ne’ebé estadu halo inklui ba munisípiu sira.
 Sistema rekursu umanu modernu hahú husi rekruta ema no agora hahú koko atu uza sistema ne’e. Bainhira responde duni nesesidade, sei halo iha instituisaun governu tomak atu uza sistema rekursu umanu ne’ebé dezenvolve ona.
Diretór esplika, iha mós aplikasaun ba buka servisu iha kapasidade atu identifika nesesidade ka área servisu ne’ebé ema buka barak liu nune’e governu bele hetan informasaun klaru kada tinan ema buka servisu hamutuk na’in hira.
TIC TIMOR  hahú halo mós portal ba Ministériu Edukasaun no Siénsia Kultura, SEPFOPE, inklui mós aplikasaun kona-ba Voice Over IP (VOIP) katak l uza ona telefone konvensionál hodi telefone maibé uza internet hodi halo ligasaun telefone ho ida ne’e, governu la selu  kustu ba telemovel sira.  
Entretantu dezeñu portal úniku ne’e rasik prevee iha enkuadramentu dalimak  husi planu TIC TIMOR I.P nian. # Média TIC#