TIC TIMOR DISPONIVEL ATU DIJITALIZA SISTEMA FIXA FAMÍLIA HODI SENTRALIZA DADUS FAMÍLIA ONLINE

Diretór Aplikasaun Ajénsia Tecnologia da Informação e Comunicação (TIC) TIMOR I.P, Justo Fernandes ho nia ekipa, hala’o enkontru ho Diretór Nasionál Apoiu Administrasaun Suku (DNAAS), Ministériu Administrasaun Estatál (MAE), Egas José Caetano, hodi ko’alia  kona-ba oinsá TIC TIMOR I.P bele apoiu MAE hodi dijitaliza sistema Fixa Família nune’e bele sentraliza sistema dadus nasionál.

TIC TIMOR foti inisiativa ida ne’e, tanba Timor-Leste iha problema administrasaun barak. Ho ida ne’e, Ajénsia foti inisiativa hodi hato’o karta ba MAE liu husi DNAAS, karik iha posibilidade bele dijitaliza sistema Fixa Família tanba liu husi polítika VIII Governu Konstitusionál iha tinan oin sei foka liu ba sistema administrasaun  públika.

Relasiona ho ida ne’e Diretór Aplikasaun TIC TIMOR I.P, Justo Fernandes hatete, MAE iha planu ruma kona-ba oinsá atu dijitaliza sistema refere ka lae, nune’e TIC TIMOR bele buka meius oinsá servisu hamutuk hodi ajuda dezenvolve sistema ida ne’e.

Nia dehan, Sistema ne’e bainhira dezenvolve la’ós asesu de’it iha nasionál maibé, to’o iha nivel suku bainhira asesu ba liña internet sei bele asesu ba Fixa Família no bele update online ba dadus sira.

Hatán ba kestaun ne’e, Diretór Nasional Apoiu Administrasaun Suku (DNAAS), Egas José Caetano hatete, Loos duni MAE nia servisu ne’e to’o iha munisípiu, suku no aldeia maibé to’o agora rejistu Fixa Família husi territóriu tomak sei utiliza sistema manual. MAE rasik tuir diploma ministerial númeru 49/2017 kona-ba resenseamentu uma kain ne’ebé maka rejistu liu husi livru administrasaun suku utiliza de’it sistema manual.

Sistema manual ne’e, nia impaktu maka bainhira Governu presiza atu fahe subsídiu ruma sempre komplikadu ho dadus.

Nia dehan, MAE liu husi DNAAS agradese ba TIC TIMOR nia inisiativa tanba bele ajuda ministériu ida ne’e, oinsá atu instala sistema dijitalizasaun ba rekollamentu rejistu uma kain liu husi Fixa Família ne’e importante tebes. Sira konkorda atu uza sistema ida ne’e atu ajuda ministériu ida ne’e.

Entretantu parte rua ne’e diskute no avansa ho projetu pilotu ida no munisípiu Dili maka sei sai pilotu.  suku ne’ebé sei  implementa projetu ida ne’e  maka hanesan, suku Bairru Pite, reprezenta Postu Administrativu Dom Aleixo,  Suku Greshingfor reprezenta Postu Administrativu Nain Feto, suku Camea  sei reprezenta Postu Administrativu Cristo Rei no suku Caicoli sei reprezenta Postu Administrativu Vera Cruz. #MÉDIA TIC#