TIC TIMOR FASILITA TREINAMENTU BA TÉKNIKU ICT HUSI LIÑA MINISTERIAL SIRA

Ajénsia Tecnologia da Informação e Comunicação (TIC) TIMOR I.P, liu husi Divizaun Infraestrutura, fasilita treinamentu kona-ba Internetworking Concepts Network ba tékniku Information Communications  Technology (ICT), husi liña Ministerial sira ne’ebé iha ona ligasaun mai TIC TIMOR I.P.

 

Objetivu husi treinamentu ne’e, atu hasa’e tékniku sira nia koñesimentu hodi hadi’a liu tan sira nia rede internal iha idak-idak nia instituisaun bainhira hetan problema.

 

Iha serimónia enserramentu, Diretór Ezekutivu TIC TIMOR I.P, Roberto Caitano de Sousa Vicente hatete,  nia parte hein katak buat ne’ebé tékniku sira aprende husi TIC TIMOR bele aplika iha sira nia servisu loroloron.

 

Xefe Ezekutivu Informa katak, treinamentu ne’e, hola parte husi planu ne’ebé TIC TIMOR iha, tanba Ajénsia iha kbiit naton atu fó formasaun sira no sei iha kontinuasaun la’ós iha rede de’it maibé mós, kona-ba aplikasaun ruma liu-liu iha área espesializadu kona-ba dezenvolve programasaun, no seguransa sibernétika.

 

Iha biban ne’e, Askar Syarif, hanesan treinadór hatete, Matéria ne’ebé fó, la’ós báziku liu maibé prepara sira atu hetan sertifikadu kona-ba rede nian no matéria ne’ebé hanorin iha relasaun ho Cisco Certified Network Associate (CCNA).

 

Treinamentu ne’e, fó prioridade ba liña ministerial sira ne’ebé iha ona ligasaun mai TIC TIMOR maibé fó mós espasu ba liña ministerial sira ne’ebé hakarak tuir no sei iha tan treinamentu iha fulan hira mai ho nivel ne’ebé avansadu.

 

Alende ne’e, reprezentante husi partisipante sira, Agradese ba TIC TIMOR tanba fó ona oportunidade ba sira hodi tuir treinamentu ida ne’e tanba TIC TIMOR hanesan sentru ba informátika no husu atu aumenta tempu naruk ituan nune’e sira bele aproveita ho di’ak.

 

Partisipante sira ne’e mai husi, Ministériu Obras Públika (MOP) na’in 2, Ministériu Negósiu Estranjeiru no Kooperasaun (MNEK) na’in 2, Ministériu Saúde (MS) na’in 2, SEPFOPE na’in 2, SERVE I.P na’in  2, Sekretaria Estadu Kooperativa (SEKOP) na’in 2, inklui  estajiáriu na’in 2 husi TIC TIMOR. 

 

Entretantu iha serimónia enserramentu ne’e, fahe mós sertifikadu ba partisipante sira no sertifikadu ne’e fahe direta husi Diretór Ezekutivu TIC TIMOR I.P. #MÉDIA TIC#