TIC TIMOR-GfD NO ADB, HALA’O ENKONTRU KOORDENASAUN SERVISU

Diretór Ezekutivu Ajénsia Tecnologia da Informação e Comunicação (TIC) TIMOR I.P, Roberto Caitano de Sousa, hala’o enkontru koordenasaun ho organizasaun Governance for Development (GfD) no Asian Development Bank (ADB) hodi haree kona-ba oinsá organizasaun rua ne’e, bele apoiu TIC TIMOR I.P, hodi fahe servisu ho objetivu atu ajuda Ajénsia ne’e, ba E-Government Readiness  Assessment.

 

GFD konkorda ona servisu ho TIC TIMOR I.P ho sira nia tékniku na’in rua apoiu Ajénsia hodi halo preparativu tomak liga ba avaliasaun ICT ho E-government  Assessment ne’ebé finansia husi GFD.

 

Tuir planu karik Covid-19 la akontese, iha tinan ida ne’e GFD hahú ona prosesu avaliasaun ba ICT no e-Government assessment maibé tama kedas iha Estadu Emerjênsia (EE) tanba ne’e governu Australia liu husi Gfd deside funsionáriu sira hala’o servisu iha uma ho ida ne’e nia implikasaun direta ba programa ne’e.

 

Iha tempu hanesan, Ajénsia mós halo hela kooperasaun ho ADB liu-liu asisténsia tékniku nune’e ADB bele fó apoiu mai iha TIC TIMOR no halo mós estudu preparativu ba e-Government tanba iha komponente programa rua ne’ebé maka hanesan maibé nia servisu la hanesan ho nune’e foti inisiativa hodi halo ADB ho GfD tur hamutuk hodi enkontru ho objetivu oinsá sira bele fahe servisu.

 

Iha enkontru ne’e, sira iha ona konkordánsia  katak, ADB sei fó apoiu ba iha programa ne’ebé maka GfD halo dadauk hodi enrikeza assessment ne’ebé maka GfD sei halo tanba assessment ne’e importante loos hanesan pasu primeiru hodi ADB apoiu liu tan assessment  tuir mai iha tinan oin se karik sira iha apoiu.

 

TIC TIMOR mós sei partilla dadus ne’ebé GfD dezenvolve, iha konkordánsia hodi bele haree hamutuk  pergunta ne’ebé maka GfD prepara nune’e sira bele aumenta tan nia kompleksidade ka komponente ruma ne’ebé maka seidauk konklui,i entaun ADB aumenta tan atu nune’e kompleta assessment ne’ebé maka GfD sei halo.

 

Karik tinan ne’e, bele remata assessment refere entaun tinan oin bazeia ba rekomendasaun ne’ebé assessment ne’e sei hato’o ADB sei haree fila fali komponente ne’ebé maka sira bele fó apoiu hanesan, peskiza liu tan no apoiu investimentu ruma atu  finansia projetu balu ne’ebé  halo.

 

Entretantu enkontru refere, hala’o liu husi Video Conference.  #Média TIC#