TIC TIMOR I.P ASINA ONA NTP BA PROJETU ESPASAUN DATA CENTER HO KOMPAÑIA TELEMOR

Xefe Gabinete Primeiru Ministru Afonso Henrique Corte Real Hamutuk Diretór Aplikasaun Ajénsia Tecnologia da Informação e Comunicação (TIC) TIMOR I.P Justo Fernandes hanesan mós Vice I Diretór Ezekutivu, asina ona Notice to Proceed (NTP), ba projetu Espansaun Data Center nian ho kompañia Telemor, iha sala enkontru TIC TIMOR I.P loron 04 fulan Jullu. 

Iha biban ne’e, Diretór Aplikasaun lori Ajénsia naran, agradese ba funsionáriu TIC TIMOR I.P tomak, tanba ho esforsu no servisu hamutuk, asina ona Notice to Proceed (NTP) ba projetu Espansaun Data Center. Hein  katak, servisu hamutuk ne’e metin nafatin no sólidu liu tan atu  hala’o kna’ar Ajénsia nian hodi responde  ba nesesidade  órgaun  estadu sira hotu iha Timor-Leste, hodi atinje mehi boot ne’ebé na’in ulun sira hatuur ona iha Planu Estratéjiku Dezenvolvimentu Nasional (PED 2030) kona-ba Governu Eletróniku (e-Government).

Projetu ida ne’e, iha nia benefísiu boot tebes, tanba, bainhira konklui, sai nu’udár infraestrutura importante hodi fornese konetividade no partilla dadus entre Governu no órgaun estadu Timor-Leste iha ámbitu governu eletróniku (e-Government).

 Nia agradese espesialmente, ba Primeiru-Ministru Taur Matan Ruak, Xefe Gabinete Primeiru-Ministru, Presidente CNA, no ekipa tomak husi CNA, ne’ebé fó ona kontribuisaun no suporta durante prosesu ne’e la’o.

Iha fatin hanesan, Xefe Gabinete Primeiru Ministru, agradese ba ekipa Ajénsia TIC TIMOR I.P ne’ebé hala’o servisu ho dilijénsia, no espíritu professional, hodi hetan duni rezultadu.

 Nia dehan, ho Instituisaun ne’e nia ezisténsia, Primeiru Ministru fó tarefa ida atu hili prioridade hamutuk ho dilijénsia, hodi bele kontribui husi boa administrasaun hodi hetan boa governasaun.

 Nia haktuir, agora ba oin hotu-hotu tenke hala’o knaar ida ne’ebé importante atu fó nota pozitivu ba VIII Governu nia reprezentasaun no dezempeñu, iha Governu Eletróniku (e-Government) ne’ebé reprezenta husi (TIC) TIMOR I.P tanba ida ne’e sai objetivu prinsipál governu nian.  #Média TIC#