TIC TIMOR I.P. ATRIBUI SERTIFIKADU BA FORMADU NA’IN 6 HOSI APC

TIC TIMOR I.P. ATRIBUI SERTIFIKADU BA FORMADU NA’IN 6 HOSI APC

Dili, 01 Fevereiru 2023

Ajénsia Teknolojia Informasaun no Komunikasaun sigla portugués (TIC) TIMOR I.P liu husi Diresaun Dezenvolvimentu Sistema Informasaun  no Aplikasaun (DDSIA), atribui sertifikadu ba formadu na’in 6 hosi Autoridade Proteção Civil (APC).

Formadu APC na’in 6 ne’ebé tuir formasaun durante loron 3 kona-ba Jestaun no Administrasaun Website remata ona sira ninia formasaun tanba ne’e Ajénsia TIC TIMOR I.P. fó apresiasaun liu hosi fahe Sertifikadu.

Iha serimónia atribuisaun sertifikadu ne’e, Diretór Diresaun Dezenvolvimentu Sistema Informasaun no Aplikasaun (DDSIA), Sr. Justo Fernandes, hatete, TIC TIMOR eziste ho ninia papél importante atu implementa Governu Eletróniku iha territóriu tomak inklui iha Instituisaun Estadu sira hotu.

“Papél TIC TIMOR nian laos serve ba TIC TIMOR de’it maibé ba iha Instituisaun Estadu sira hotu iha rai laran. Formasaun ne’ebé parte TIC fornese ba APC hanesan pakote ida ne’ebé TIC fó ba iha Instituisaun Governu sira hotu bainhira simu pedidu ruma” dehan Diretór.

Diretór realsa tan katak, TIC liu hosi Diresaun Dezenvolvimentu Sistema Informasaun no Aplikasaun laos haree de’it ba Portal maibé haree mós ba sistema hanesan rekursu umanu, ofísiu karta tama no sai, sistema Cloud no seluk-seluk tan ne’ebé TIC iha. Ida ne’e responsabilidade TIC nian.

Formasaun ne’e laos ikus ba apoiu ne’ebé TIC fó ba APC maibé sei kontinua halo manutensaun tanba ida ne’e papél hosi responsabilidade TIC TIMOR nian.

“Remata formasaun ne’e, ha’u fiar katak koñesimentu ne’ebé formadu na’in 6 iha seidauk másimu tanba buat ne’ebé relasiona ho teknolojia buat foun, ho ida ne’e TIC TIMOR nafatin fó apoiu bainhira iha difikuldade tékniku ruma TIC sei kontinua hodi halo manutensaun” informa Diretór.

Diretór mós husu ba APC atu kria kooperasaun ida liu hosi baze legal entre Instituisaun rua ne’e liu hosi asina Memorandum of Understanding (MoU)  no Service Level Agreement (SLA) hodi fahe tarefas servisu  relasiona ho teknolojia hodi nune’e bainhira mosu faillansu ruma bele hatene ninia responsabilidade.

Superior ne’e mós hato’o agradese ba APC ho ninia konfiansa ne’ebé fó ona ba TIC TIMOR hodi dezenvolve  Portal nomos fó formasaun, TIC mós prontu atu akumula nesesidade teknolojia iha APC karik APC iha planu atu dijitaliza sistema informasaun, TIC prontu atu kolabora.

Iha fatin hanesan, Xefe Komunikasaun APC Sr. João de Sousa Filipe hato’o ninia agradesimentu ba formadór TIC TIMOR ne’ebé fahe ona koñesimentu maske durasaun loron tolu la sufisiente ba sira, no sira mós husu atu Ajénsia TIC nafatin fasilita bainhira sira presiza.

Servisu informátika ne’ebé Ajénsia TIC TIMOR I.P. fasilita ba APC laos de’it iha parte  dezenvolvimentu  Portal maibé fó apoiu mós iha parte Infraestrutura nian liu hosi apoiu E-mail ofisial ba superior APC sira hahú hosi Nasionál to’o Munisípiu.

Entretantu, iha serimónia ne’e ekipa Autoridade Proteção Civil (APC) mós fó sertifikadu apresiasaun ba formadores TIC TIMOR nian na’in 4.

Iha serimónia atribui sertifikadu ne’e partisipa hosi Reprezentante UNDP, funsionáriu APC nomos funsionáriu Ajénsia TIC TIMOR I.P. #Media #TIC.