TIC TIMOR I.P., KAPASITA FUNSIONÁRIU HELPDESK HO TREINAMENTU COMPTIA A+

Ajénsia Teknolojia Informasaun no Komunikasaun sigla português (TIC) TIMOR I.P., kapasita funsionáriu helpdesk sira hodi partisipa treinamentu kona-ba COMPTIA A+.

Objetivu hosi treinamentu ne’e, atu kapasita funsionáriu destakadu sira nia kapasidade iha área troubleshooting liu-liu parte hardware nian.

Tuir Diretór Divizaun Infraestrutura TIC TIMOR I.P., André Felix Marques, katak, treinamentu COMPTIA A+ ne’e, nu’udar treinamentu ida ne’ebé, espesífiku ba helpdesk liu-liu kona-ba  oinsá atu zere no hadi’a laptop ka komputadór sira ne’ebé maka iha no halai liu ba hardware. 

“Treinamentu ba helpdesk nian ne’e, fahe ba grupu rua no grupu dahuluk maka hahú ona.  Grupu daruak sei hahú iha fulan Dezembru maibé alende treinamentu ba ida ne’e, iha mós treinamentu seluk ne’ebé maka sira ne’ebé responsabiliza ba rede nian partisipa hanesan, Cisco Certified   Network Associate (CCNA) kursu ida ne’e, halai liu ba oinsá atu kria rede foun ka konfigura ekipamentu rede nian ba kliente sira,” esplika nia.

Iha fatin hanesan, helpdesk munisípiu Vikeke, Mariano Trindade Babo, sente kontente tanba liuhosi treinamentu refere, bele fasilita helpdesk sira hodi hasa’e sira nia koñesimentu liu-liu iha área COMPTIA A+ no formasaun ida ne’e, bele tulun helpdesk sira nia servisu loroloron nian.

Nia dehan, matéria ne’ebé aprende iha treinamentu loron lima hanesan, operating system, halo instalasaun, konfigurasaun ba PC ho nia komponente sira no halo mós konfigurasaun troubleshot ba ekipamentu sira bainhira iha fallansu.

 Iha biban ne’e, aprende mós kona-ba maintenance no troubleshot Microsoft windows, network infrastructure concept no ikus liu maka konfigurasaun no troubleshot ba network nian.

“Sujere atu iha futuru, treinamentu hanesan ne’e, iha ninia kontinuasaun atu nune’e bele hasa’e liu tan ami nia koñesimentu liu-liu iha área informátika nian,” nia salienta.   #MÉDIA TIC#