TIC TIMOR I.P. LIU HOSI DIRESAUN UID REALIZA WORKSHOP KONA-BA DESIMINASAUN INFORMASAUN ID ÚNIKU

 

Ajénsia Teknolojia Informasaun no Komunikasaun sigla portugues (TIC) TIMOR I.P., liu hosi Diresaun Identidade Úniku, realiza workshop kona-ba desiminasaun informasaun ID Úniku ba funsionáriu sira hosi TIC TIMOR I.P. .

Objetivu hosi workshop ne’e, atu kolabora hamutuk hodi partilla informasaun sira hotu kona-ba programa ID ÚNIKU ba to’o iha Komunidade iha teritóriu Timor laran tomak.

Iha abertura ba workshop ne’e, Diretór Ezekutivu Ajénsia TIC TIMOR I.P., Sr. Roberto Caitano de Sousa Vicente hatete, liu hosi Workshop ida ne’e, bele halo funsionáriu TIC TIMOR sira hotu bele iha koñesimentu di’ak kona-ba saida maka ID Úniku?; Tanba sá Presiza ID Úniku?; Benefísiu Saida hosi ID Úniku?; no Impaktu saida de’it maka sei fó hosi ID Úniku ida ne’e ba ita nia rain Timor-Leste? Ho ida ne’e, marka tan pasu foun ida iha esforsu atu alkansa Programa VIII Governu nia ba iha Boa Governasaun iha área Governu Eletróniku ka E-Government.

TIC TIMOR hanesan Instituisaun Públikú ne’ebé harii iha VI Governu Konstitusionál liu hosi Dekretu-Lei no.29/2017 iha 02 Agostu 2017 no Tutela ba Primeiru-Ministru. Ajénsia ida ne’e hari’i ho baze atu dezenvolve di’ak liutan setór Informasaun, Komunikasaun no Teknolojia sigla ingles (ICT) hodi hafasil servisu ho kualidade di’ak ba Governu no sosiedade tomak.

Diretór ne’e hatete, hahú tinan ne’e TIC TIMOR iha papél importante ida hanesan Ajensia Implementadór hodi lidera implementasaun programa ID Úniku ba iha Governu Eletróniku.

Programa Identidade (ID) Úniku nu’udar komponente fundamentál ba implementasaun Planu Dezenvolvimentu Estratéjiku (PEDN 2011-2030), Kapítulu 5, “Kuadru Institusional atu hadi’a teknolojia informasaun no komunikasaun hodi apoiu Governu konjuntu no inisiativa Governu Eletroniku (E-government).”

Identidade Úniku sai mós hanesan solusaun idahosi Programa Reforma Administrativa hahú 2019 to’o 2023 ho nia área prioridade VIII Governu nian (prioridade no. 6) hanesan deklara iha semináriu nasional jornada orsamentál ba OJE 2022 no informa mós iha reuniaun Kordenasaun Parseiru Dezenvolvimentu sira.

TIC Timor I.P sai hanesan Ajénsia implementadór hodi jere Programa ID Úniku ida ne’e. Ho ida ne’e, TIC TIMOR I.P estabele Diresaun ID Úniku nu’udar Entidade Transitória ne’ebé durante implementasaun projetu sei halo preparasaun hodi muda ba Ajénsia IDU rasik iha futuru.

Objetivu ID Úniku atu fornese mekanismu seguru, protejidu no konfiavel ba sidadaun hotu atu bele verifika sira nia autentisidade Identidade ho servidór sira.

Alende ne’e Diretora Interina Diresaun ID Úniku Sra. Fátima da Silva Caldas, mós halo aprezentasaun kona-ba progresu servisu ne’ebé durante ne’e la’o ona.

Entretantu iha biban ne’e halo aprezentasaun materia sosializasaun programa IDU no halo mós diskusaun kona-ba programa ne’e rasik. #MÉDIA TIC#