TIC TIMOR I.P. NO KAK REALIZA ENKONTRU HODI KONTINUA DISKUTE PLATAFORMA FORMULÁRIU ONLINE BA DRBI

Ajénsia Teknolojia Informasaun no Komunikasaun, sigla português (TIC) TIMOR I.P., no Komisaun Anti Korupsaun (KAK) realiza enkontru hodi kontinua diskute kona-ba plataforma formuláriu online ba Deklarasaun Rendimentu Bens no Interese (DRBI) ho Ekipa Tékniku TIC TIMOR I.P., no KAK, iha sala enkontru KAK Faról Dili.

Objetivu hosi sorumutu ne’e, atu fó sekuénsia no kontinuidade ba aseitasaun sira ne’ebé TIC TIMOR no KAK halo no servisu balun ne’ebé hala’o ona hosi ekipa tékniku hosi instituisaun rua ne’e, atu hetan abordajen ida ba dezenvolvimentu plataforma dijitalizasaun DRBI nian bazeia lei númeru 7/2020 kona-ba Medidas Prevensaun no Kombate Korupsaun, sigla português (MPCC).

Iha enkontru ne’e, Komisáriu KAK, Sérgio Hornai, Lori KAK nia naran apresia ho TIC TIMOR I.P., ba esforsu sira hodi bele entende no tau hamutuk esforsu sira hosi parte teknolojia informasaun ninian nomós iha leitura ida kona-ba letra hosi lei ba iha lei MPCC nian no formula formuláriu ida ninia baze ba iha konteúdu lei nian.

Nia dehan, parseria ida ne’e, importante tebes ba KAK maske iha ninia servisu informátika rasik ne’ebé TIC TIMOR nu’udar insituisaun estadu nian oinsá maka bele apoiu instituisaun sira seluk  atu bele setup  dadus ida ne’ebé metin ho ninia seguransa jurídiku idak-idak nian, konsolida ona atu evita esesu hodi estraga ema nia dadus pesoál. Tribunal Supremu no KAK nu’udar órgaun implementadór maibé laiha kbiit natoon atu bele haree kestaun tékniku tanba ne’e, husu tulun ba TIC TIMOR atu bele fó apoiu tékniku.

Iha fatin hanesan, Diretór Ezekutivu TIC TIMOR I.P., Roberto Caitano de Sousa Vicente Agradese ba konfiansa ne’ebé KAK fó ba TIC TIMOR hodi sai parseiru hodi dezenvolve sistema ne’ebé reflete duni ba saida maka lei haruka tanba enkontru ne’ebé halo hanesan kontinuasaun hosi enkontru ne’ebé halo tiha ona iha tinan kotuk no agradese tanba hetan feedback hosi uzáriu ne’e di’ak  hodi bele hafasil liu tan servisu atu dezenvolve sistema refere hodi reflete ba saida maka presiza atu enkaixa iha sistema.

TIC TIMOR prontu atu asegura dadus tanba ne’e, sistema Governu nian no ida ne’e, sujeitu ba diskusaun no desizaun polítikamente hosi KAK no téknikamente ekipa tékniku sei diskute.

Iha biban ne’e, Tékniku TIC TIMOR I.P., Geovanio Frederico de Jesus Vinhas, halo aprezentasaun tékniku kona-ba plataforma formuláriu online DRBI nian ba   Komisáriu KAK, adjuntu Komisáriu sira, Diretór Ezekutivu TIC TIMOR inklui Diretór Jerál no Xefe Departamentu sira hosi KAK.

Entretantu Ekipa tékniku ne’ebé dezenvolve plataforma refere, lidera hosi Diretór Divizaun Dezenvolvimentu Sistema Aplikasaun TIC TIMOR I.P., Justo Fernandes, servisu hamutuk ho ekipa tékniku hosi KAK.   #MÉDIA TIC#