TIC TIMOR I.P. NO LNS I.P., HALO KOOPERSAUN SERVISU BA KOMPONENTE 4 IHA ÁREA INFORMÁTIKA

Ajénsia Teknolojia Informasaun no Komunikasaun (TIC) TIMOR I.P, marka tan istória hodi asina akordu ho Laboratóriu Nasionál Saúde (LNS) I.P., ba komponente haat iha área informátika nian. 

Komponente haat ne’e mak: “Internet Protocol Address” no korrespondente (LNS.GOV.TL) ho ninia rekizitu nesesáriu sira seluk hodi estabelese enderesu sistema portál website, Servisu Email, sistema aplikasaun no servisu konetividade nesesáriu sira seluk, ne’ebé presiza atu dezenvolve no fornese iha futuru. Fornesimentu servisu hirak-ne’e, sei deskreve ho detallu iha Service Level Agreement (SLA).

Diretór Ezekutivu TIC TIMOR I.P., Roberto Caitano de Sousa Vicente, iha ninia diskursu hateten, liuhosi servisu-hamutuk ida-ne’e, LNS I.P. mós sei kontribui ba esforsu TIC TIMOR I.P. nia servisu hodi hamenus gastu la nesesáriu iha área Informátika, sentraliza no asegura dokumentu informasaun iha Sentru-dadus Governu Eletróniku, fasilita asesu ba padraun Teknolojia no aplikasaun ne’ebé modernu, seguru, atualizadu, dezenvolve no asegura hosi Timór-oan rasik.

Ho asinatura Nota Entendimentu ida-ne’e ba futuru sei kontinua ho akordu nivel servisu sira. Laboratóriu Nasionál Saúde I.P. (LSN I.P.)  hola parte hamutuk ho Ajénsia Estadu haatnulu- resin-ualu ona (48) ne’ebé mak agora dadauk uza hela servisu informátika iha TIC TIMOR no iha area oin-oin. Tan ne’e, fiar katak hahú hosi asinatura MoU ida-ne’e, bele loke-dalan ba kooperasaun iha área barak liután ba futuru iha ámbitu servisu informátika nian.

“Akordu ne’ebé mak asina nu’udar konkluzaun hosi prosesu ne’ebé maka la’o tiha ona iha tinan 2019 hodi fornese servisu balu, ne’ebé maka LNS presiza iha área informátika. Memorandu entendimentu ne’ebé asina entre TIC TIMOR I.P. ho LNS ho objetivu atu ofisializa servisu ne’ebé maka durante ne’e, TIC TIMOR fornese dadauk ona ba LNS,” Esplika Xefe Ezekutivu.

Iha fatin hanesan, Diretora Ezekutiva, LNS I.P., Endang Soares Silva afirma, selebrasaun ida-ne’e, nu’udar selebrasaun ida, ne’ebé mak importante tebes ba servisu LNS nomós TIC TIMOR tanba agora iha era teknolojia durante ne’e, enfrenta mós problema iha sistema informasaun teknolojia.

Ho nune’e, hein katak, ba oin, bele hadi’a liután servisu relasiona ho informasaun teknolojia iha LNS.

“Parte rua ne’e, hala’o kolaborasaun hahú hosi tinan 2019 maske seidauk iha akordu ruma maibé ho vontade ne’ebé iha TIC TIMOR hahú fornese Email ofisiál ba funsionáriu sira aleinde apoiu ida-ne’e, apoiu mós LNS iha kriasaun website tanba durante ne’e LNS seidauk iha website ne’ebé eziste maibé ho akordu ida-ne’e, foka ba oin atu apoia mós website,” esplika nia

Nia dehan,  sira nia parte hein katak, servisu ida-ne’e, la’ós atu kobre de’it iha nivel nasionál maibé servisu laboratóriu nu’udar servisu ida, ne’ebé maka luan tebes atu iha nasionál ka munisipál.

Entretantu Nota Entendimentu ne'e, asina husi Diretor Ezekutivu TIC TIMOR I.P. Roberto Caitano de Sousa Vicente  ho Diretora Ezekutiva LNS I.P. Endang Soares Silva no iha biban ne'e asina mos SLA ne'ebe asina husi Diretor Divizaun Dezenvovimentu Sistema Aplikasaun (DSA), Justo Fernandes no  Diretora Ezekutiva LNS I.P., Endang Soares Silva , iha  Salaun LNS Bidau Toko Baru. #MEDIA TIC#