TIC TIMOR I.P. REALIZA WORKSHOP HO TEMA “TIC TIMOR MAKA DALAN BA GOVERNU ELEKTRÓNIKU”

Ajénsia  Tecnologia da Informação e Comunicação (TIC) TIMOR I.P., realiza workshop iha ámbitu selebrasaun Aniversáriu TIC TIMOR I.P. ba dala haat ne’ebé ho tema “TIC TIMOR MAKA DALAN BA GOVERNU ELETRÓNIKU,”.

Objetivu hosi workshop ne’e atu halo diskusaun kona-ba Polítika Internu Ajénsia TIC TIMOR nian, nomós haree ba progresu servisu kada Divizaun sira nian, identifika obstákulu ne’ebé hasoru no planu servisu ba futuru.

Iha abertura workshop ida-ne’e, Diretór Ezekutivu TIC TIMOR I.P., Roberto Caitano de Sousa Vicente hatete, Ajénsia bele atinji ninian tarefa serbisu kada tinan tamba funsinariu tomak nia kontribuisaun.

Nia dehan, durante tinan haat nia laran, TIC TIMOR alkansa buat barak ona ba saida maka hatu’ur iha planu estratéjiku no balu konsege ultrapasa ona.

Xefe Ezekutivu ne’e mós husu nafatin ba funsionáriu hotu-hotu tenke kontribui atu hadi’a nafatin servisu sira ne’ebé presiza hadi’a.

Ikus liu, Xefe Ezekutivu ne’e enkoraja nafatin funsionáriu sira-nia partisipasaun másimu hodi halo servisu ho di’ak  hodi atinje objetivu finál no misaun Ajensia nian.

Workshop ne’e, hala’o durante loron rua nia laran no hetan partisipasaun másimu hosi funsionáriu sira inklui funsionáriu sira ne’ebé destaka iha munisípiu 12.

Entretantu atividade ne’e, hala’o iha salaun Sui Room, Timor Plaza.  #MÉDIA TIC#