TIC TIMOR NO MAPKOMS HALA’O ENKONTRU HODI FAHE INFORMASAUN KONA-BA ICT

Diretór Ezekutivu Ajénsia Tecnologia da Informasaun Comunicação (TIC) TIMOR I, Roberto Caitano de Sousa Vicente akompaña husi Diretór Aplikasaun Justo Fernandes no Diretór Infraestrutura André Felix Marques, hala’o enkontru ho Ministru Asuntu Parlamentár no Komunikasaun Sosiál (MAPKOMS), Francisco Martins da Costa Pereira Jerónimo hodi fahe informasaun kona-ba Information Communications Technology (ICT) nian.
Iha enkontru ne’e, Xefe Ezekutivu hatete, karik MAPKOMS presiza saida maka iha relasaun ho ICT, Ajénsia TIC TIMOR I.P prontu atu koopera hodi fó solusaun.
Iha biban ne’e, halo mós aprezentasaun kona-ba Papél TIC TIMOR I.P nian, ne’ebé  implementa polítika liga ba Governu Eletróniku hodi prepara teknolojia ne’ebé ótimu inklui aplikasaun, infraestrutura nomós rede Fibra Ótika Terrestre (FOT) bazeia ba prioridade nasionál.TIC TIMOR mós haree ba internet no intranet, fó mós asesoria ba governasaun tomak. Infraestrutura kompleta ona Fibra Ótika Terrestre (FOT) no koneta ona ba   munisípiu 12. Liu husi FOT ne’e mós, fornese ona ligasaun ba liña ministerial sira kona-ba konetividade internet. Ajénsia mós halo ezbosu lei kona-ba ICT.
Alende ne’e, informa mós kona-ba servisu ne’ebé Ajénsia kompleta ona hanesan, sentru dadus nasionál ba Governu Eletróniku, hosting website, fornese servisu sira hanesan Email, domain name no hosting. TIC TIMOR mós halo ona web hosting, agora dadauk ajuda liña ministerial sira no Ajénsia Governu sira hodi dezenvolve website sira tuir nesesidade ministériu sira nian nomós, aplikasaun balun ne’ebé hakarak dezenvolve, parte aplikasaun prontu atu kolabora. Parte aplikasaun mós, fó suporta ba liña ministerial sira bainhira, iha difikuldade kona-ba treinamentu ruma, inklui utilizasaun sistema, TIC TIMOR I.P prontu atu fornese.  
Ho nune’e Ministru MAPKOMS hatete, ho informasaun ida ne’e, di’ak ba Ministériu  hodi kompriende di’ak liu tan  no sei haree fila fali oinsá maka hadi’a fila fali buat ne’ebé seidauk loos
Entretantu TIC TIMOR mós kria ona Email ofisial ba MAPKOMS no  rejistu ona nia domain   no halo ona teste. Bainhira remata ona , ekipa tekiniku  sei halo aprezentasaun kona-ba lala’ok oinsá, atu utiliza E-mail ne’e. #MÉDIA TIC#