TIC TIMOR PRONTU ATU KONTINUA FÓ APOIU TÉKNIKU BA MESCC IHA ÂMBITU TEKNOLOJIA

Relasiona ho lansamentu website Ministériu Ensinu Superior Siénsia no Kultura sigla português (MESCC)nian ne’ebé dezenvolve husi Ajénsia Tecnologia da Informação e Comunicação (TIC) TIMOR I.P nomós website Institutu Nasional Siénsia no Teknolojia sigla português (INCT) ne’ebé hosting iha sentru dadus TIC TIMOR nian, Diretór Ezekutivu TIC TIMOR I.P, Roberto Caitano de Sousa Vicente hatete, Ajénsia prontu atu kontinua fó apoiu tekniku ba MESSC no INCT iha área teknolojia nian.
 
Tuir Xefe Ezekutivu katak, MESCC iha ona kooperasaun ho TIC TIMOR I.P hahú kedas husi email ofisial, sistema rekursu umanu no website.
 
Nia dehan, ekipa tékniku mós halo ona avaliasaun ba infraestrutura ministériu nian hodi hatene loloos oinsá atu koneta rede internet no  halo planu proposta orsamentu ba infraestrutura ministériu ne’e nian nomós ekipa divizaun aplikasaun mós antes ne’e hala’o ona enkontru ho parte tékniku ministériu nian kona-ba oinsá dezeña website nomós maneira atu jere website ne’e rasik.
 
TIC TIMOR mós sei kontinua fó apoiu tékniku hodi halo manutensaun ba iha área informátika, fó  treinamentu ba tékniku sira husi MESCC no sei fó mós apoiu espesífiku iha área teknolojia nian.
 
Nia parte mós hato’o agradesimentu ba MESCC ba konfiansa ne’ebé fó ba TIC TIMOR hodi dezenvolve website nomós website INCT nian ne’ebé hosting iha sentru  dadus TIC TIMOR nian tanba TIC TIMOR nia papél atu sentraliza dadus Governu nian iha fatin ida.
 
Iha fatin hanesan MESCC, Longuinhos dos Santos, hato’o agradesimentu ba kolaborasaun no servisu exelente husi responsavel sira no tékniku TIC TIMOR tanba ajuda ona MESCC hodi dezenvolve website atu tranzmite informasaun sira MESCC nian. Nia parte mós afirma ida ne’e hanesan pasu ida atu hadi’a sistema ministériu nian.
 
Serimónia lansamentu website ne’e halo iha âmbitu komemorasaun loron nasionál ensinu superior no kultura, aniversáriu ANAAA ba dala 10 no aniversáriu UNTL ba dala 20 inklui loron mundiál siénsia ba paz no dezenvolvimentu.
 
Entretantu partisipa iha serimónia ne’e, maka Vise Primeira Ministra Asuntu Sosiál, Armanda  Berta dos Santo, Ministru asuntu Parlamentares no Komunikasaun Sosiál (MAPKOMS), Francisco Martins da Costa Pereira Jerónimo, Sekretáriu Estadu Arte  no Kultura,  Teófilo Caldas, Sekretáriu Estadu ba  Komunikasaun Sosiál (SEKOMS), Merício Juvenal dos Reis, Diretór Ezekutivu ANAAA, Edmundo Viegas, Presidente INCT, José Cornelio Guterres,  Diretora Ezekutiva FDCH, Leila Cárceres do Santos, magnífiku Reitór husi Universidade sira nomós konvidadus sira seluk.   #MÉDIA TIC#