- Tetum
- Português
- English
VISE-DIRETÓR EZEKUTIVU TIC TIMOR I.P ENTREGA SERTIFIKADU BA TÉKNIKU HUSI INDMO
mediatic - Tue, 07/13/2021 - 11:57
Vise-Diretór Ezekutivu Ajénsia Tecnologia da Informação e Comunicação (TIC) TIMOR I.P, Justo Fernandes, hanesan mós Diretór Divizaun Sistema Aplikasaun, entrega sertifikadu ba Tékniku sira husi Instituto Nacional de Desenvolvimento Mão de Obra (INDMO), ne’ebé tuir treinamentu kona-ba jestaun administrasaun website ne’ebé fornese husi TIC TIMOR I.P.
Objetivu husi treinamentu ne’e, atu fó koñesimentu ba tékniku sira husi INDMO atu nune’e bele entrega no jere rasik sira nia website.
Iha serimónia entrega sertifikadu ne’e, Vise-Diretór Ezekutivu TIC TIMOR I.P, agradese ba INDMO ne’ebé fó ona konfiansa ba TIC TIMOR nu’udar Ajénsia teknolojia ida iha Timor-Leste atu ajuda realiza mehi ne’ebé durante ne’e iha.
TIC TIMOR prontu atu kolabora tanba TIC TIMOR harii ho dekretu lei ne’ebé iha atu responde duni nesesidade ne’ebé iha. Bainhira treinamentu ida ne’e hotu TIC TIMOR prontu nafatin atu fó apoiu tékniku tanba ida ne’e parte husi Ajénsia nia kometimentu komesa husi dezenvolvimentu sistema.
Iha fatin hanesan, Diretora INDMO, Isabel Fernandes de Lima hatete, hafoin asina akordu INDMO ho TIC TIMOR atu estabelese website maske ema husi estranjeiru barak maibé atu garante liu seguransa ba dadus relasiona ho dijitalizasaun nian TIC TIMOR maka instituisaun ne’ebé importante tebes atu bele akomoda dokumentu importante sira no informasaun sira.
Tanba ne’e iha loron tolu nia laran konsege servisu hamutuk hodi fó treinamentu ba pesoál na’in rua hodi bele jere website INDMO nian importante liu sira bele aprende oinsá maka atu jere website ne’e ho di’ak tuir regra no prosedimentu ne’ebé maka iha atu labele falla.
Hein katak, ho rezultadu treinamentu loron hira nia laran, ba oin bele jere ona maibé INDMO sei kontinua atu konsulta ho parte tékniku husi TIC TIMOR relasiona website no sei lansa ofisialmente.
Alende ne’e, Ricardo Bait da Costa, hanesan partisipante ba treinamentu ne’e, agradese ba tékniku sira husi TIC TIMOR, ne’ebé fó ona treinamentu jestaun administrasaun website nian ba sira. Sira mós sei konsulta nafatin ho tékniku sira husi TIC TIMOR bainhira iha fallansu ruma. #MÉDIA TIC#