VISE MINISTRU INTERIOR HUSU TIC TIMOR ATU KOOPERA HODI ATUALIZA INFORMASAUN MINISTÉRIU NIAN

 
Vise Ministru Interior (MI), António Armindo, husu Ajénsia Tecnologia da Informação e Comunicação (TIC) TIMOR I.P, atu koopera ho Ministériu Interior hodi buka mekanizmu oinsá atu atualiza informasaun relevante ministériu nian liu husi website ne’ebé MI iha tanba durante ne’e seidauk atualiza informasaun sira kona-ba servisu Ministériu ne’e nian nomós  informasaun sira relasiona ho formuláriu visa.
 
Iha sorumutu entre parte rua ne’e, Vise Ministru hatete,  sira presiza TIC TIMOR nia ajuda kona-ba website Ministériu nian tanba  to’o agora seidauk atualiza informasaun ne’ebé  la’o hela.
 
Nia afirma, sira mós presiza atu fó sai programa ministériu nian atu nune’e ema bele haree servisu ministériu nian.
 
Alende ne’e, Vise Diretór Ezekutivu TIC TIMOR I.P no Diretór Aplikasaun, Justo Fernandes hatete, ida ne’e inisiativa di’ak hodi husu TIC TIMOR atu koopera iha parte teknolojia tanba Ajénsia ne’e nia papél  atu fasilita koordenasaun entre liña ministeriál sira liu husi aplikasaun informátika tanba ne’e, Ajénsia haree oinsá ba oin servisu di’ak liu tan ho instituisaun estadu sira atu fó apoiu nomós iha hanoin ida atu sentraliza sistema rekursu informátika iha espasu ne’ebé maka Governu kria ona iha TIC TIMOR.
 
Entretantu, sei iha tan enkontru tékniku entre  instituisaun rua ne’e hodi diskute kle’an liu tan kona-ba asuntu tékniku.  #MÉDIA TIC#