XEFE GABINETE-PRIMEIRU MINISTRU FÓ POSE BA MEMBRU KONSELLU ADMINISTRASAUN TIC TIMOR IHA ÂMBITU SELEBRASAUN ANIVERSÁRIU TIC BA DALA-TOLU

 Xefe Gabinete Primeiru-Ministru, Azevedo Lourenço da C. Marçal, reprezenta Sua Exelénsia Primeiru-Ministru Taur Matan Ruak, fó pose membru Konsellu Administrasaun Ajénsia Tecnologia da Informação e Comunicação (TIC) TIMOR I.P na’in lima ba períodu tinan lima, iha âmbitu selebrasaun aniversáriu TIC TIMOR ba dala tolu.

Membru hirak ne’e, kompostu husi Roberto Caitano de Sousa Vicente nu’udar Diretór Ezekutivu TIC TIMOR I.P, Joanico Pinto, reprezentante husi Ministériu Finansas (MF), João Pereira, reprezentante husi Ministériu Justisa(MJ), Bonifácio do Carmo, reprezentante husi Ministériu Interior(MI), no Fernando Carvalho da Cruz, reprezentante husi Ministériu Transporte no Komunikasaun(MTK).

Iha biban ne’e, Diretór Ezekutivu TIC TIMOR I.P hatete, TIC TIMOR nia papél importante hodi sentraliza dadus Governu iha âmbitu Governu Eletróniku.

Nia dehan, iha servisu lubuk ida maka TIC TIMOR atinje ona maske enfrenta dezafiu oioin durante iha tinan rua nia laran maibé dezafiu hirak ne’e, sai hanesan motivasaun hodi servisu ho rezultadu ne’ebé di’ak.

Alende ne’e, Xefe Gabinete Primeiru-Ministru hato’o parabéns ba emposadu sira ho esperansa katak, membru Konsellu ne’ebé kompleta bele ajuda di’ak liután servisu TIC TIMOR nian tuir Primeiru-Ministru nia mensajen katak, Governu Konstitusionál dala-VIII tau prioridade mós ba Governu Eletróniku atu bele ajuda governasaun ne’ebé dijitaliza liu no efisiente hodi hamenus sistema klásiku durante ne’e no bele hakbesik liután governasaun besik povu.

 Xefe Gabinete mós dezafia hela TIC TIMOR I.P atu hamosu inovasaun sira liu-liu karik bele kria free balance timor-nian ka "TimorBalance".

Nia fiar katak, ho prezensa TIC TIMOR nian ne’e, bele servisu hamutuk setór hotu-hotu hodi kria sistema eletróniku ne’ebé efisiente hodi dijitaliza sistema governasaun.

Entretantu Iha biban ne’e, Ajénsia TIC TIMOR I.P mós lansa relatóriu Progresu Servisu TIC TIMOR I.P durante ne’e, halo lansamentu ba Dashboard Covid-19 ne’ebé sei asesu liu husi mobile no Web Application inklui Government Cloud System, no VOIP. #MÉDIA TIC#