Díli, 12 Jullu 2024—Diretór Ezekutivu Ajénsia TIC TIMOR I.P. Sr. Venâncio Pinto akompañia husi Fiskál Úniku Sr. Jose Asa, Vise-Diretór Ezekutivu Sr. Eligio Moniz do Rego, Diretores husi Diresaun hotu, hamutuk ho funsionáriu Ajénsia tomak, hala’o reuniaun avaliasaun dezempeñu semestrál iha salaun CNE, Kolmera.   

Reuniaun avaliasaun ne’ebé Ajénsia TIC TIMOR realiza, hanesan metodu ida ne’ebé utiliza hanesan sasukat ba avaliasaun dezempeñu servisu funsionáriu sira hodi notifika meta servisu ne’ebé funsionáriu sira halo iha fulan neen (6) nian laran, hodi halo melloramentu servisu iha futuru  tuir tarjetu ne’ebé planea ona, atu nune’e bele atinje metas instituisaun nian tuir programa IX Governu Konstituisionál  mensiona ona.    

Alende ne’e, enkontru ida ne’e hanesan mós oportunidade atu fortalese jestór sira, bainhira halo avaliasaun no promosaun ba funsionáriu tuir duni kriteria no avaliasaun ba kualidade servisu funsionáriu sira presta.  

Iha enkontru ne’e, Diretór Ezekutivu Ajénsia TIC TIMOR I.P. Sr. Venâncio Pinto, hato’o ninia apresiasaun ba kargu Diresaun no Xefia sira, nomos funsionáriu sira hotu, ba kontribuisaun servisu ne’ebe sira presta ona durante ne’e hodi atinje metas tuir planu Ajénsia nia.

“Ha’u hato’o Ha’u nia apresiasaun bo’ot tebes ba ekipa sira hotu iha Ajénsia nia laran tomak,  ne’ebé ha’u lidera, sem imi nia kontribuisaun, ha’u sei labele hamrik iha ne’e no tur iha ne’e. Ba imi hotu ninia kontribuisaun servisu sira hotu, sai hanesan realidade hodi hala’o funsaun de servisus Ajénsia nian, ne’ebe atribui ona iha programa IX Konstitusional número 2.8 no 6.7”. Esklarese Superior ne’e.   

Diretor Ezekutivu  ne’e mós enkoraja funsionáriu sira hotu, atu hatudu dezempeñu servisu ne’ebé diak, efisiénsia, efikásia no dedikasaun profisionál, iha realizasaun ida-idak ni devér. Tamba hó  prestasaun servisu ne’ebé diak, kreatividade no inovasaun ne’ebé konsistente tuir duni regras instituisaun nian, atu nune’e bele alkansa planu prioridade Ajénsia nian iha tinan 2024 ne’e.

“Ita mai iha TIC TIMOR tenke konsiente katak, ita mai atu fó  kontribui ba desenvolvimentu ba sosiedade no nasaun ida ne’e, labele sai nudar oportunidade atu benefisia ita nia aan deiit, maibé tenke tau nudar responsabilidade hanesan sidadaun hodi bele kontribui progresso ba país ida ne’e nia desenvovimentu. Karik ita tau nudar oportunidade ita sei la la’o ba oin, no la foku totalmente ba servisu. Bainhira ita servisu hó  responsabilidade tomak, ha’u fiar katak, ida-idak sei la’o tuir koreder hodi atinje planu ne’ebé ita estabelese ona iha 2024” dehan Diretór Ezekutivu.

Iha opportunu ne’e, Diretór Ezekutivu mós husu ba kargu Diresaun no Xefia no funsionariu sira hotu, atu lembra fila-fali progresu hotu ne’ebé Ajénsia atinje ona, hodi selebra susesu ne’ebé iha, nune’e bele hatudu  komitmentu ba objetivu ne’ebé sei mai iha futuru, ho dedikasaun positiva no espíritu inovasaun, hodi kontinua dezenvolve no alkansa transformasaun dijitál iha país Timor-Leste.  

Iha enkontru avaliasaun ne’e,  Diretór kada Diresaun, Xefi Únidade sira halo mós aprezensaun kona-ba progresu servisu ne’ebé atinje ona, dezafius ne’ebé funsionáriu sira enfrenta,  durante fulan neen(6) ne’ebé realiza aprezentasaun mak hanesan;  Diresaun Dezenvolvimentu Sistema Informasaun no Aplikasaun (DDSIA), Diresaun Servisu Infraestrutura Rede (DSIR), Diresaun Sentru Dadus (DSD), Diresaun Servisu Koorporativu (DSK), Diresaun Finansa (DF), Únidade Seguransa Sibernetika inklui Timor Dijitál.   

Entretantu, iha sorumutu ne’e partisipa mós husi Diretór kada Diresaun sira, kargu Xefia, Assesor,  kada Únidade inklui Funsionáriu Ajénsia  tomak tantu iha nível Nasionál, nune’e mos funsionárius husi Munisípiu 12 (sanulu resin rua).

(Média TIC)