JAKARTA, 20 Maiu 2025___Embaixadór Timor-Leste ba Jakarta Sr. Roberto Sarmento de Oliveira Soares hamutuk ho Diretór Ezekutivu Ajénsia TIC TIMOR I.P. Sr.  Venâncio Pinto lansa portal ofisiál Embaixada Timor-Leste iha Jakarta ne’ebé dezenvolve husi Ajénsia TIC TIMOR, iha âmbitu komemorasaun loron restaurasaun independénsia ba dala-XXIII.

Objetivu prinsipál husi inisiativa ida-ne'e, atu hadi'a dezempeñu, konfiabilidade no seguransa husi komunikasaun nian, iha nivel sentrál no iha misaun sira iha rai-li'ur. Esforsu ne'e, sei loke dalan ba implementasaun iha futuru husi sistema jestaun sentraliza hodi aumenta efisiénsia no seguransa ba instituisaun sira.

Kooperasaun servisu ida ne’e, nu'udar parte ida husi esforsu sira ne'ebé la'o dadauk atu hadi'a sistema Teknolojia Informasaun no Komunikasaun (TIK) iha embaixada sira liuhusi servisu hamutuk ho Ministériu Negósiu Estranjeiru no Kooperasaun (MNEK) ho objetivu atu integra no reforsa seguransa ba dadus institusionál sira.

Agora dadauk TIC TIMOR mós estabelese ona sinkronizasaun ba servidores iha Embaixada Jakarta ba Sentru Dadus Governu Eletróniku ne’ebé jere husi TIC TIMOR.  Esforsu ida ne'e, atu asegura integridade no asesu di'ak ba dadus embaixada nian.  

Alende ne’e, Ajénsia TIC TIMOR mós kria no halo konfigurasaun domíniu ba kada embaixada sira iha nasaun estranjeiru no misaun diplomátika sira hotu iha estranjeiru inklui instalasaun servidór lokál ba kontrolu domíniu (replikasaun Domain Controller) nomós replikasaun ba basze de dadus hanesan arkivu sira. Estabelesimentu ligasaun Virtual Private Network (VPN) ne’ebé seguru entre embaixada sira, misaun diplomátika sira no korreius eletróniku.

Entretantu serimónia ne’e parstisipa mós husi Adidu sira, konsuladu Timor-Leste iha Bali, kupang no Atambua inklui funsionáriu sira ne’ebé servisu iha Embaixada Timor-Leste iha Jakarta.

 (MÉDIA TIC)