Díli, 07 Jullu 2025___Ministru Justisa Sr. Sérgio de Jesus Fernandes da Costa Hornai hamutuk ho Diretór Ezekutivu Ajénsia TIC TIMOR I.P. Sr. Venâncio Pinto nomós Komisáriu Komisaun Terras no Propriedade (KTP) lansa portál ofisiál Komisaun KTP ninian ne’ebé dezenvolve husi TIC TIMOR I.P..

Portál ofisiál ne’e, atu tranzmite atividade servisu sira ne’ebé KTP halo ba públiku hodi bele asesu tantu iha rai laran nomós iha estranjeiru ho efisiénsia no efikásia.

Iha diskursu Diretór Ezekutivu TIC TIMOR Sr. Venâncio Pinto, gradese ba Ministériu Justisa liuhusi Komisaun Terras no Proriedade (KTP) ne’ebé fó ona konfiansa ba TIC TIMOR hodi dezenvolve portál ofisiál ida ne’e. TIC TIMOR ho Ministériu Justisa mós hala’o ona kooperasaun antes ne’e hodi dezenvolve sistem Ajendamentu Online.

“Ida ne’e, pasu importante ida ba TIC TIMOR no KTP atu nune’e, iha futuru bele koopera tan servisu hodi integra rede ida ne’ebé, integradu ba intranet. Ami hein hela husi Diresaun Nasionál Notariadu hodi bele aselera lalais sistema integradu hanesan ho Ministériu Administrasaun Estatál nian ne’ebé hetan ona koneksaun intgradu husi nasionál ba munisípiu,”.

 Diretór Ezekutivu mós husu atu, Sistema sira ne’ebé iha Ministériu Justisa liu-liu iha Diresaun Nasionál Notariadu bele hosting iha server backup TIC TIMOR nian. TIC TIMOR mós orgullu tebes ba KTP ne’ebé iha inisiativa atu halo koneksaun integradu husi edifísiu nasionál KTP ba Munisípiu 12 no hein katak, iha fulan oin bele halo ona levantamentu dadus husi munisípiu hotu atu bele halo konetividade liña integradu lokál.

Xefe Ezekutivu salienta tan katak, TIC TIMOR nafatin servisu makaas atu asegura sistema informasaun Ministériu Justisa nian nomós instituisaun estadu sira hotu.

 Iha fatin hanesan Ministériu Justisa Sr. Sérgio de Jesus Fernandes da Costa agradese ba TIC TIMOR ninia disponibilidade, hodi halo kooperasaun interministerial iha nivel servisu tékniku ninian atu bele konkretija kooperasaun sira hodi halo modernizasaun, atulizasaun dinámika, evolusaun ba prestasaun servisu sira iha sistema teknolojia informasaun nian.

 “Governu buka esforsu ba ninia servisu sira atu introdus polítika ida dijitalizasaun. Ita hotu-hotu hatene katak, mundu modernu agora labele ses aan husi teknolojia nomós informasaun. Ita presiza ajusta ita nia aan ba sistuasaun modernu ba instituisaun estadu nomós instituisaun privadu sira, atu bele hatan ba iha fenómena dezenvolvimentu evolusaun dinámika iha sosiedade mundu agora,”.

Governante ne’e informa, Timor-Leste restaura ona independénsia ba dala 23 oinsá atu re komfigura nia hanoin atu bele priense kriteria sira oinsá, maka bele buka ida ne’ebé di’ak atu bele halo prestasaun ne’ebé di’ak iha área oioin inklui ba iha dijitalizasaun teknolojia informasaun ne’ebé sai hanesan prioridade programa Governu nian hodi moderniza informasaun hotu-hotu ba iha komunidade liuhusi atividade sira ne’ebé presta sentíkamente nu’udar informasaun estadu ninian atu nune’e bele iha baze dadus ida konsolidade.

Ho ida ne’e, Governu hamutuk ho instituisaun estadu sira buka identifika saida maka importante atu bele kontribui ba instituisaun estadu ninian, atu bele hametin liu tan jestaun no polítika estadu nian liu-liu iha dijitalizasaun.

 Ministru mós husu nafatin, instituisaun sira ne’ebé tutela iha Ministériu Justisa atu kria mós website hodi bele haklaken informasaun ba komunikadade. Presiza nafatin kolaborasaun no aseita hodi hosting server backup iha sentru dadus Governu nian iha Palásiu Governu atu nune’e, bele presta servisu ho lalais, efisiente, efikásia ho kustu ida ne’ebé baratu ba sidadaun sira.

Lori ministériu nia naran agradese ba inisiativa entre KTP no TIC TIMOR hodi dezenvolve website ida ne’e.

Entretantu serimónia ida ne’e, hala’o iha salaun Ministériu Justisa Kolmera no partisipa mós husi diresaun sira ne’ebé tutela iha Ministériu Justisa. (MÉDIA TIC)