Díli, 14 Jullu 2025___Diretór Ezekutivu Ajénsia TIC TIMOR I.P., Sr. Venâncio Pinto hamutuk ho Diretór Jerál Administrasaun no Finansas Interinu Ministériu Transporte no Komunikasaun Sr. Pascoal Cuoto lansa sistema Jesataun Patrimóniu Estadu MTK nian ne’ebé, dezenvolve husi TIC TIMOR I.P..

Plataforma ne’e, ninia objetivu atu funsiona servisu sira ho efisiénsia, efikásia no fasilita kontrolu ba aspeitu hotu-hotu hodi salva guarda bem estar públiku nian no fornese servisu públiku ho kualidade di’ak.  

Iha serimónia lansamentu ne’e, Diretór Ezekutivu TIC TIMOR Sr. Venâncio Pinto hatete, relasiona ho Governu-Eletrónku ne’ebé iha Timor-Leste, ezizi atu halo jestaun ba Sistema Governu Online hanesan, transformasaun husi sistema manual ba sistema eletróniku ho baze tranformasaun tekonolojia dijitál no jestaun administrasaun públika ne’ebé sei dezenvolve hela.

Alende esforsu atu implementa kompromisu programa IX Governu Konstitusionál nian, hodi hala’o modernizasaun administrativa liuhusi asesu ba intranet no internet iha instituisaun estadu nian mai iha sentru dadu Governu Eletróniku hanesan, dezekreve ona iha programa IX Governu nian hanesan, pilar xave iha ajenda dezenvolvimentu nasionál ba tinan lima ninian.

Servisu ne’ebé Ajénsia TIC TIMOR durante ne’e hala’o, bazeia ba artigu 5 dekretu lei númeru 29/ 2017 ne’ebé atu dezenvolve no hala’o manutensaun ba Governu-Eletróniku, sentraliza sistema no dadus, forma efisiénsia no efikásia.

“Ida ne’e hanesan, instrumentu atu hadi’a prestasaun servisu, hasa’e efisiensia no efikásia Governu nian no promove kresimentu ekonomia inkluzivu no sustentável, informa Diretór Ezekutivu”.

Xefe Ezekutivu afirma tan katak, ho prioridade hirak ne’e, forma ona fundamentu ida ne’ebé, forte no metin ba inisiativa transformasaun teknolojia dijitál, hodi moderniza setór hotu-hotu ho área prioridade sira hanesan, Agrikultura, Edukasaun, Saúde, Adminnistrasaun Públika nomós setór Transporte no Komunikasaun liuhusi inovasaun, konetividade no kapasidade dijitál hodi hasa’e prestasaun servisu no dudu prosesu transformasaun dijitál iha Timor-Leste.

Mandatu programa IX Governu Konstitusionál fó biban ba TIC TIMOR nu’udar Ajénsia Tekonolojia hodi konkretija asaun sira iha área teknolojia nian iha Ministériu Transporte no Komunikasaun nia okos hodi halo modernizasaun estadu no hadi’a funsionamentu no prestasaun servisu sira iha instituisaun públika sira.  

“Desde inisiu mandatu IX Governu Konstitusionál Diresaun Dezenvolvimentu Sistema Informasaun no Aplikasaun simu pedidu lubuk ida kuaze 200 resin husi instituisaun estadu, sosiedade sivíl inklui igreja no parokia sira ba dezenvolvimentu sitema aplikasaun no kapasitasaun iha área teknolojia, total pedidu hirak ne’e, seidauk inklui servisu hirak ne’ebé hala’o husi diresaun seluk,”. 

Lider Másimu TIC TIMOR ne’e eplika katak, servisu hirak ne’ebé TIC TIMOR halo kontribui makaas ba poupansa Orsamentu Jerál Estadu (OJE) kada tinan ho total montante kuaze $ 7 to’o $ 10 milloens. Husi total sistema aplikasaun sira ne’e, dezenvolve husi tékniku timor oan hotu.

TIC TIMOR sei nafatin fó asisténsia téknika no nafatin tau matan ba sistema asesibilidade atu fasilita ministériu hodi hala’o ninia papél no responsabilidade no ida ne’e, la’os de’it atu fó solusaun maibé atu asegura katak, sistema sira ne’e, seguru no funsionál.

Diretór Ezekutivu mós hato’o agradesementu ba Ministériu Transporte no Komunikasaun ne’ebé, depozita ona komfiansa tomak ba TIC TIMOR hodi servisu hamutuk bele realiza Sistema Jestaun Patrimóniu Estadu MTK ninian.

Iha fatin hanesan Diretór Jerál Administrasaun no Finansas Interinu Ministériu Transporte no Komunikasaun Sr. Pascoal Cuoto hatete, MTK servisu hamutuk ho Ministériu Finansas nomós TIC TIMOR hodi halo lansamentu ba Sistema Jestaun Patrimóniu Estadu ne’e hodi bele fasilita servisu Ministériu nian ho sistema dijital.

Nia parte agradese ba TIC TIMOR, ne’ebé disponivel hodi dezenvolve ona sistema ida ne’e, atu bele fasilita servisu ho lalais.

Entretantu serimónia lansamentu ba sistema ne’e, hala’o iha Salaun MTK no hetan partisipasaun másimu husi Diretores no Xefe Departamentu sira inklui funsionáriu sira husi TIC TIMOR nomós MTK.

 (MÉDIA TIC)