Díli, 28 Agostu 2025____ Ajénsia TIC TIMOR I.P., realiza kompetisaun talentu ICT hodi komemora loron aniversáriu TIC TIMOR ba dala 8 (ualu), iha salaun Ministériu Transporte no Komunikasaun (MTK) Kaikoli, ne’ebé abertura ofisial efetua husi Diretór Ezekutivu TIC TIMOR Sr. Venâncio Pinto.

Eventu kompetisaun ida ne’e, nu’udar oportunidade di’ak ba estudante sira, ne’ebé hola parte iha kompetisaun hodi eleva sira nia koñesimentu no inovasaun ne’ebé, optimiza potensialidade iha área ICT no dijitál.

Iha abertura eventu kompetisaun ICT ne’e, Diretór Ezekutivu TIC TIMOR I.P. Sr. Venâncio Pinto hatete, mundu agora tama ona ba era teknolojia no dijitál ne’ebé, atualmente avansadu tebes. Teknolojia sai hanesan komponente ne’ebé importante iha globalizasaun, nomós moris lor-loron.

Tanba ne’e, husu ba joven estudante universintáriu sira, tenke preparadu iha situasaun global ne’ebé konektadu iha dijitalizasaun ba área oioin hanesan; edukasaun, saúde, agrikultura, ekonomia no seluk tan.

“Fiar katak, estudante sira ne’ebé hola parte iha kompetisaun ida ne’e, la’os premiu maka sai motivasaun, maibé fiar katak estudante sira mai hó sira nia sincere intensaun atu hatudu talentu no abilidade ne’ebé hetan iha idak- idak nia universidade,”.

Diretór Ezekutivu esplika katak, kompetisaun ida ne’e, fó oportunidade ba estudante universitáriu sira atu aprende hodi halo melloramentu ba idak-idak nia abilidade.

Ohin pasu importante tebes ba partisipante sira ne’ebé tuir kompetisaun ida ne’e, tanba TIC TIMOR hanesan, Ajénsia tekonolojia Informasaun no Komunikasaun Governu nian, hakarak tebes fó oportunidade ba joven universitáriu sira hodi aumenta sira nia koñesimentu, partikularmente iha área ICT.

Lider Másimu TIC TIMOR ne’e mós enkoraja nafatin partisipante sira ne’ebé tuir kompetisaun ida ne’e, atu aproveita didi’ak oportunidade ida ne’e, hodi prepara sira nia aan ba futuru.

Partisipante sira iha kompetisaun ida ne’e kompostu husi universidade sira hanesan; UNTL, UNDIL, IOB, DIT nomós IPDC.

Entretantu iha serimónia abertura ba kompetisaun ne’e, partisipa husi Prezidente Komisaun Organizadora Dr. Eusebio Guterres, Diretora DCS Sra. Helen Esmeral Catarina Gomes, Diretór DDSIA Sr. Justo Fernandes, Diretór DSIR Sr. Henrique Fulgencio Guterres, Diretór Centru Dadus Sr. Rusmin Vicente Soares, Xefe Unidade Seguransa Sibernétika Sr. Agostinho de Araújo Pereira, ekipa komisaun organizadora inklui dosente sira husi universidade sira ne’ebé partsipa iha kompetisaun ne’e. (MÉDIA TIC)