Díli, 28 Agostu 2025- Universidade 5 partisipa kompetisaun kona-ba “ICT Talent Hunt”, ne’ebé realiza husi Ajénsia TIC TIMOR I.P., iha Salaun Ministériu Transporte no Komunikasaun (MTK) Kaikoli.

Objetivu husi kompetisaun ne’e, atu eleva koñesementu estudante sira nian iha área ICT, no hodi esplora pesoal ne’ebé mak iha potensialidade ba área ICT, durante realizasaun komemora aniversáriu TIC TIMOR nian ba dala 8, iha loron 29 Agostu 2025.

Iha oportunidade ida ne’e , Xefi Unidade Cyber Security, Sr. Agostinho Araújo Pereira, informa katak, kompetisaun ne’e realiza iha âmbitu komemorasaun aniversáriu TIC TIMOR nian ba dala 8, tanba ne’e mosu konseitu ida, oinsa atu buka hasa’e abilidade estudante universitáriu sira nian iha área Dijital, liu-liu relasiona ho ambisaun Timor-Leste ne’ebe atualmente adapta hó mudansa teknolojia iha mundu.

“ Âmbitu ba realizasaun kompetisaun ida ne’e, hodi identifika kapasidade no koñesementu estudante sira nian iha área ICT, no sai núdar mos oportunidade diak ba estudante sira, hodi fortifika liutan koñesementu hirak ne’ebé sira aprende ona iha universidade”.

Kompetisaun “ICT Talent Hunt”, ne’e fahe ba kategoria 3 hanesan, Cyber CTF, Software Development no Network Challenge, no hetan partisipasaun husi universidade 5, hanesan, Universidade Nasionál Timor Lorosa’e (UNTL), kompostu husi ekipa 3, Universidade Díli (UNDIL) ekipa 2, Dili Institute of Teknolojia (DIT) ekipa 3, Institute of Business (IOB) ekipa 3, Institute Profisional de Canossa (IPDC) ekipa 2, no atividade ne’e realiza durante loron ida.

Estudante husi ekipa 12, ne’ebé kompostu husi, universidade 5, manan nai’n ba kategoria Cyber CTF, primeiru lugar husi IOB ho valor 194, segundu lugar UNTL valor 190, terseiru lugar DIT valor 60. Ba kategoria Network Challenge, primeiru lugar UNTL ho valor 68,5, segundu lugar DIT valor 66, no terseiru lugar IOB valor 65. Ba kategoria Software Development, primeiru lugar husi IPDC valor 65, segundu lugar UNTL valor 56,3 no terseiru lugar husi DIT valor 53.

Iha okaziaun ne’e, hetan observasaun direta husi, Diretor Ezekutivu Ajénsia TIC TIMOR I. P., Sr. Venâncio Pinto, Diretora Diresaun Servisu Koorporativa, Sra. Helen Esmeralda Catarina Gomes, Prezidente Komisaun Organizadora hanesan mos Assesor Jurídiku Senior, Sr. Eusebio Guterres, Diretor Dezenvolvimentu Sistema Informasaun no Aplikasaun, Sr. Justo Fernandes, Diretór Servisu Infraestrutra Rede (DSIR), Sr. Henrique Fulgêncio Guterres, Diretor Sentru Dadus, Sr. Rusmin Vicente de Fátima Soares, Xefi Diresaun Dezenvolvimentu Implementasaun no Integrasaun Sistema, Sr. Geovannio Ferderico de Jesus Vinhas, Xefi Departamentu Planeamentu Infraestrutura Rede, Sr. Salvador da Costa Oliveira, Kordenador Helpdesk, Sr. Florencio Morais G. de Fátima, Xefi Departamentu Seguransa Rede Operasional Sentru Dadus, Sr. Agapito dos Santos Barreto, Xefi Departamentu Rede, Sr. Guilherme Amaral, Xefi Departamentu Treinamentu no Jestaun Sistema Informasaun, Sr. Noberto Soares Cristovão, inklui mos ekipa Tékniku funsionáriu TIC TIMOR sira, iha eventu ne’e partisipa mos husi Prezidente Assosiasaun Informasaun Comunikasaun no Teknolojia (ICT, Sigla Portugués ) Sr. Natalio Raimundo. (MÉDIA TIC