Díli, 29 Agostu 2025____ Diretór Ezekutivu Ajénsia TIC TIMOR I.P Sr. Venâncio Pinto hamutuk ho Fiskál Úniku (FU) Sr. José Asa, Diretores sira nomós funsionáriu tomak, hala'o selebrasaun aniversáriu Ajénsia TIC TIMOR I.P. ba dala ualu ho tema " Tinan 8 TIC TIMOR harii Transformasaun Dijitál no Dedikasaun ba Servisu Públiku ho Kuliadade ba Sosiedade iha Ậmbitu Governu Eletróniku," iha salaun Ministériu Transporte no Komunikasaun (MTK) kaikoli.

Iha okaziaun ne’e, Diretór Ezekutivu TIC TIMOR Sr. Venâncio Pinto hato’o, apresiasaun ba funsionáriu tomak iha TIC TIMOR ne’ebé fó ona dedikasaun tomak, hodi kontribui ba Ajénsia ida ne’e no ba rai doben Timor-Leste.

Agradese ba MTK ne’ebé fó suporta másimu ba susesu tomak TIC TIMOR nian hodi alkansa iha mandatu ida ne’e.

Tama ba tinan 8, TIC TIMOR alkansa ona buat barak hodi hasa’e kualidade servisu sira hodi dezenvolve infraestrutura dijitál iha aspeitu aplikasaun, centru dadus, hospedajen no seluk tan hodi kontribui ba ekonomia nasaun ninian no fiar katak sei dezenvolve di’ak liu tan iha futuru no sei la ses husi dezafiu sira.

Iha serimónia ne’e, Xefe Ezekutivu TIC TIMOR husu ba ba funsionáriu hotu atu kontinua servisu hamutuk atu alkansa objetivu no vizaun IX Governu nian inklui fó benefísiu di’ak liu tan ba komunidade.

“Pontu tolu ne’ebé, halo ha’u sai optimiza maka hanesan, ema hotu ne’ebé iha TIC TIMOR ho konsiénsia no nasionalismu forte hakarak kontribui ba dezenvolvimentu Timor-Leste nian, segundu tanba ita nia hamutuk ne’ebé forte tebes, hodi infrenta kualker sistuasaun ne’ebé mai husi internu no esternu maibé ita nafatin firme hodi servisu ho kualidade e’ebé di’ak no oferese servisu tomak ne’ebé, di’ak ba bem estar estadu no povu nian. Pontu datolu maka pesoál Timor oan sira ne’ebé servisu iha TIC TIMOR maioria Timor oan ne’ebé ho abilidade ne’ebé aas no professional,”.

Lider Másimu ne’e, enkoraja funsionáriu tomak katak, hasoru dezafiu maibé, labele lakon esperansa tanba esperansa sai hanesan motivu ida ba ema hotu hodi servisu ho di’ak, ho dedikasaun ne’ebé halo, sei fó vantajen ba Timor-Leste.

Iha fatin hanesan, Xefe Gabinete Ministériu Transporte no Komunikasaun Sr. José da Costa reprezenta Ministru MTK hatete, TIC TIMOR iha ninia vizaun klaru, hodi konduz transformasaun dijitál iha Timor-Leste liu-liu atu asegura katak, teknolojia iha Timor-Leste bele sai hanesan, ponte ida ba dezenvolvimentu no hanesan ponte ida ba oportunidade no inovasaun povu Timor-Leste tomak.

Reprezentante Ministru fiar katak, ohin loron la’os selebra de’it aniversáriu maibé selebra mós atinjimentu sira durante tinan hira nia laran liu-liu hametin atendementu públiku nomós empodera sidadaun sira atu asesu informasaun di’ak liu ho lalais.

“ Tinan ida ne’e ita la’os hare ba kotuk de’it maibé ita ms hateke ba oin saida maka TIC TIMOR bele halo tan no hadi’ak liu tan iha pájina sira tuir mai atu asegura dijitalizasaun la’os de’it kona-ba feramentu ida atu grante efisiensia maibé iha dalan ida katak iha duni inkluzaun no iha situasaun ida ne’ebé ema hotu-hotu,”.

Alende ne'e , fahe mós sertifikadu apresiasaun nomós premiu ba manán na’in husi universidade sira ne’ebé kompete ona iha kompetisaun ICT iha âmbitu komemorasaun aniversáriu ba dala 8.

Entretantu serimónia ne’e, partisipa husi, Diretór Jerál MTK, Prezidente no reprejentante husi Ajénsia sira ne’ebé tutela ba MTK, Asesor Parlamentu Nasional, Sr. Joãozito Viana, estudante universitáriu sira inklui funsionáriu TIC TIMOR. (Média TIC)