DILI, 15 Jullu 2024,-Ekipa tékniku Ajénsia TIC TIMOR I.P., liu husi Diresaun Dezenvolvimentu Sistema Informasaun no Aplikasaun (DDSIA) fó formasaun jestaun administrasaun portal ofisiál ba funsionáriu husi Sentru Nasionál ba Formasaun Profisionál sigla portugues (CNFP).

Objetivu husi formasaun ne’e, atu fasilita funsionáriu sira oinsá atu jere no administra portál refere hodi transmite informasaun CNFP nian ba públiku.

Iha abertura ba formasaun ne’e, Diretór DDSIA Sr. Justo Fernandes hateten, bazeia ba programa IX Governu Konstitusionál ho nia objetivu  atu fasilita kapasitasaun ba funsionáriu públiku sira, iha territóriu nasional iha  Timor-Leste kona-ba oinsá atu utiliza sistema dijitál ho finalidade ba melloramentu ba funsionamentu prestasaun servisus iha instituisaun públikas sira.

Iha tinan ida ne’e, TIC TIMOR servisu hamutuk ho Komisaun Funsaun Públika no INAP hodi halo esdutu viabilidade kona-ba kapasitasaun ba funsionáriu públiku sira iha área teknolojia.

Tanba mundu ohin loron asuntu teknolojis importante tebes atu fasilita  funsionamento servisu lor-loron, liu-liu iha Timor-Leste mos pretende hela atu adere  ba ASEAN no WTO. Ho ida ne’e, hahú agora tenke foku ba área teknolojia tanba oras ne’e dadauk tama ona ba mundu dijitál.

Iha fatin hanesan Diretora Ezekutiva CNFP Sra. Bernardete Pinto Miranda Gomes, hato’o nia agradesimentu ba TIC TIMOR ne’ebé disponivel ona hodi responde ba pedidu ne’ebé CNFP hato’o hodi dezenvolve portal ofisiál.

Alende ne’e Diretora Ezekutiva mós husu ba TIC TIMOR, atu dezenvolve mós sistema baze dadus ba CNFP hodi bele fasilita servisu administrasaun.

Nia parte mós husu ba formandu sira, atu aproveita didi’ak formasaun ne’e hodi bele jere rasik portal ofisiál hodi transmite informasaun ba públiku.

Entretantu formasaun ne’e, hala’o iha edifísiu CNFP Bekora durante loron tolu. Hafoin formasaun TIC TIMOR sei atribui sertifikadu apresiasaun ba formandu hirak ne’ebé partisipa ona formasaun. (Média TIC)