ERMERA, 03 JUÑU 2024- Ajénsia TIC TIMOR I.P., liu husi Diresaun Dezenvolvimentu Sistema Informasaun no Aplikasaun (DDSIA) fó formasaun sistema informasaun hanesan, Sistema Rekursu Umanu, Sistema Ofísiu nomós Sistema Cloud GoTL ba funsionáriu Administrasaun Munisipál Ermera.

Objetivu husi implementasaun sistema sira ne’e mak atu fasilita servisu instituisaun nian ho efisiénsia, efisikásia no implementasaun Governu Eletróniku hodi transforma servisu manuál ba dijitál.

Iha abertura ba formasaun ne’e Diretór Interinu DDSIA Sr. André Felix Marques hatete, TIC TIMOR hanesan implementador ba teknolojia informasaun no komunikasaun ba instituisaun estadu hotu jere dere, infraestrutura IT, sistema aplikasaun sira nomós sentru dadus inklui fó asisténsia téknika bainhira instituisaun estadu sira presiza.

Diretór interinu esplika, Sistema Rekursu Umanu ninia funsaun atu jere servisu sira ne’ebé liga ho parte Rekursu Umanu hanesan arkivu dadus funsionáriu nian, halo jestaun lisensa, avaliasaun dezenpeñu, absensia no servisu sira seluk tan. Sistema Ofisiu atu jere prosesu administrasaun ba karta korespondénsia hanesan karta tama, karta sai no karta internal hanesan rejistu no arkiva karta tama no karta sai, halo despaisu no Sistema GoTL Cloud atu jere dokumentu servisu sira.

Nia parte mós husu ba funsionáriu sira atu proveita didi’ak formasaun ida ne’e, atu bele jere fali sistema hirak ne’e iha sertivu fatin.

Sekretáriu Autoridade Administrasaun no finanansas Munisípiu Ermera Sr. Jose da Costa Gomes agradese ba TIC TIMOR ne’ebé disponível ona hodi dezenvolve sistema hirak ne’e no fó ona formasaun ba funsionáriu sira oinsá atu utiliza sistema hirak ne’e.

Sekretáriu informa, Sistema hirak ne’e importante tebes atu minimiza gastus ba surtahan sira no fasil atu halo arkivamentu ba servisu tomak iha autoridade munisipál.

Sira nia parte husu nafatin TIC TIMOR ninia apoiu atu bele fó asisténsia téknika bainhira hasoru problema tékniku ruma.

Entretantu formasaun ne’e hala’o iha Administrasaun Munisipál Ermera durante loron lima. (MÉDIA TIC)