AJÉNSIA TIC TIMOR I.P. ASINA AKORDU NIVEL SERVISU HO SEFOPE

Díli, 08 Fevereiru 2024—Ajénsia TIC TIMOR I.P. Asina Akordu Nivel Servisu, (Sigla: Ingles “Service Level Agreement”, SLA) ho Sekretáridu Estadu Formasaun Profisionál no Empregu (SEFOPE) hodi suporta ba servisu tekníku hanesan “Web Hosting Services” iha edifisiu SEFOPE Kaikoli-Dili.

Akordu “Service Level Agreement” (SLA) ne’e, asina direta husi Diretór Ezekutivu Ajénsia (TIC) TIMOR I.P., Sr. Venâncio Pinto S. Kom. ho Diretór Jerál Servisus Kooporativus, Sr. Nelson Soares Carvalho.

Iha ambitu serimonia ne’e, Diretór Ezekutivu TIC TIMOR hato’o agradese ba Sekretáriu Estadu Formasaun Profesionál Empregu, (SEFOPE) no ninia estrutura tomak ho konfiansa ne’ebe fó mai iha Ajénsia TIC TIMOR  hanesan Ajénsia Estadu ida ne’ebe foku ba iha área informatika, teknolojia no komunikasuan, dehan Diretór iha ninia diskursu.       

Ajensia TIC TIMOR ho ninia papél prinsipál iha ambitu IX Governu konstitusional nian mak fiabiliza teknolojia, informasaun no komunikasuan nian liuhosi garante réde komunikasaun ida ne’ebé fiável ho kualidade no seguru hodi promove governu elektroniku liuhusi dalan dijitálizasaun nian, responde ba necesidade Governasaun ida ne’ebé diak hodi dezenvolve liña komunikasaun entre governu ba governu no entidade sira hotu, dehan Diretór Ezekutivu.

Superior ne’e realsa katak, asina SLA ne’ebe realiza ona entre Ajénsia TIC ho SEFOPE marka pasu ida ne’ebe hametin liutan liña kooperasaun entre instituisaun rua ne’e hodi hadi’ak diak liutan programa servisu SEFOPE iha ambitu Teknolojia, informasaun no komuniasaun nian.

Iha fatin hanesan Sekretáriu Estadu Formasaun Profesionál Empregu, (SEFOPE), Sr.Rogério Araujo Mendonça hatete, SEFOPE agradese ho kooperasaun ne’ebé hala’o ho TIC tanba bainhira halo implementansaun  “Web Hosting Services”  bele ona fasilita funsionariu sira ne’ebé hala’o servisu iha munisipíu bele asesu direta ba iha dadus sira SEFOPE nian.

Sekretáriu Estadu akresenta tan,  durante ne’e parte Diresaun Munisipal nian halo atendementu ba públiku barak liu hetan difikuldade. Tanba ne’e SEFOPE liu-hosi Diresaun Nasionál Merkadu Traballu no Diresaun Nasionál Tekniku Informatika husu apoíu ba TIC TIMOR hodi fornese programa “Web Hosting Services” ne’e bele ona evita movimentu ba sira ne’ebé mai formasaun iha nasionál.

Ba futuru SEFOPE nafatin kria liña kooperasaun ho TIC oinsa bele aloka funsionariu sira ba iha Postu Administrativu sira, hodi buka hatene informasaun ruma kona-ba joven sira ne’ebé mak hetan ona formasaun no balun ne’ebé mak hetan ona servisu atu bele halo filafali ajustamentu ba sistema baze dadus Munisipiu nian, informa Sekretariu Estadu SEFOPE iha ninia diskursu.  

Iha serimonia ne’e, partisipa mós husi Kargu Xefia sira husi SEFOPE, TIC TIMOR  inklui tekníku sira.

(Média TIC)