GOVERNU TL LANSA APLIKASAUN AJENDAMENTU ONLINE DEZENVOLVE HUSI TIC TIMOR I.P.

Díli, 18 Janeiru 2024— ohin lansamentu aplikasaun ajendamentu online dezenvolve husi TIC TIMOR I.P. ba Ministeriu Justisa, liu husi dezenvolve sistema oráriu online ba pasaporte, kartaun identidade, sertifikadu rezidénsia di'ak no sertidaun moris.

Durante ne’e públiku kestiona tebes ho servisu Diresaun Jerál Notariadu nian kona-ba atendimentu ba trata Passporte tanba ne’e Ajénsia TIC TIMOR solisiona ho inisiativa dezenvolve aplikasaun ajendamentu online ida hodi oferese ba Ministériu Justisa (MJ) nune’e bele resolve atendementu publiku liu husi ajendamentu manual transforma ba iha dijitalizasaun.

Iha lansamentu ne’e, S.E. Ministru Transporte no Komunikasaun (MTK) Eng. Miguel Marques Gonҫalves Manetelu, hateten, bainhira aplika ona sistema dijitalizasaun signifika moderniza ona administrasaun públiku liu husi programa IX Governu Konstitusional nian iha implementasaun  governu eletroníku no dijitalizasaun dokumentu sira asuntu ne’e sai kriteriu ida ba Timor-Leste nia adezaun ba ASEAN.

S.E. Ministru mós hato’o agradese ba Ministériu Justisa tanba fó konfiansa ba Ministériu Transporte no Komunikasaun (MTK), liuhusi TIC hodi bele servisu hamutuk mellora  atendimentu ba  sidadaun sira, ho dignu. Modernizasaun prosesu atendementu publiku iha administrasaun estadu nia sei faziadamente.

Iha fatin hanesan, Ministru Justisa Dr. Amândio de Sá Benevides hato’o agradese ba Ministériu Transporte no Komunikasaun no TIC TIMOR tanba apoíu dezenvolve ona aplikasaun ida ne’ebé durante ne’e sai preokupasaun ba ema hotu nian ho lansamentu ne’e fiar bele ona rezolve espetativa públiku nian kona-ba atendimentu públiku iha Timor-Leste.

Lider Masímu MJ ne’e haktuir tan, ho ajendamentu online ida ne’e funsionáriu MJ nian bele hala’o servisu ho diak tebes tanba Aplikasaun ne’e kontrola direta husi TIC TIMOR.

Ministru Justisa mós husu ba TIC atu kontinua dezenvolve aplikasaun sira seluk ne’ebé relasiona ho atendimentu públiku hodi nune’e bele rezolve problema hirak ne’ebé sidadaun sira hasoru. inklui servisu MJ nian iha munisipiu sira.

Entretantu, Diretór Ezekutivu Ajénsia TIC TIMOR I.P. Sr. Venâncio Pinto S.Kom. hanesan mós lider masímu Ajénsia nian dehan, TIC ninia papél mak atu implementa Governu Eletroníku iha Timor-leste tanba ezistensia TIC TIMOR nian atu solisiona implementasaun governu-elektroniku ne’ebe ohin ajendamentu online ba iha Ministeriu Justisa hanesan pasu importante ida husi implementasaun programa IX governu konstitusional nian iha modernizasaun Sistema administrasaun publika no atendementu sira liu husi sistema dijitalizasaun.

Tanne’e ohin iha Memorandu Entendimentu ne’ebe asina husi Ministru Justisa no Ministru Transporte no Komunikasaun haree ba asuntu sira hanesan; 1.Forenesementu servisu hospedajen VPS nian, 2.Dezenvolvimentu sistema oráriu online ba pasaporte, kartaun identidade, sertifikadu rezidénsia di'ak no sertidaun moris. 3. Dezenvolvimentu sistema titular nain ba rai. 4. Dezenvolvimentu Sistema arkivu elektroniku.

Diretór Ezekutivu TIC realsa tan papél atu suporta kualker Instituisaun sira tanba TIC mós sei kontinua kria sistema ba Instituisaun Estadu sira seluk kona-ba atendimentu públiku nian hodi nune’e bele rezolve preokupasaun sidadaun sira nian durante ne’e, informa Diretór Ezekutivu.

Ajénsia TIC TIMOR mós agradese ba Ministériu Justisa liuhusi Diresaun Jerál Notariadu tanba fó  konfiansa ona mai Ajénsia TIC hodi dezenvolve sistema ida ne’ebé ho zero kustu no aplikasaun ajendamentu online ne’e foin aplika iha Diresaun Jerál Servisu Notariadu Munisípiu Dili nian tanba seluk seidauk bele aplika kestaun prosesu faziadamente haree ba ekipamentu ne’ebé iha Notariadu, seidauk bele solisiona ba  iha Munisípiu hotu.

Serimonia ne’e partisipa mós husi,S.E. Vise-Ministru ba Fortalesimentu Institusionál, Paulo Manuel da S. dos Remédios, S.E. Sekretáriu Estadu Terras no Propriedades, Jaime Xavier Lopes,  Ekipa Ezekutiva Ajénsia TIC TIMOR I.P. kargu Diretór Jerál sira husi Ministériu Justisa (MJ), Ministériu Transporte no Komunikasaun (MTK), reprezentante husi UNICEF nomos partisipante husi Ministeriu relevante sira.

(Média TIC)