TIC TIMOR I.P. ATRIBUI SERTIFIKADU BA FUNSIONÁRIU IHA MINISTÉRIU INTERIOR

DILI, 19 Fevereiru 2024 - Ajénsia TIC TIMOR I.P., liu hosi Diresaun Dezenvolvimentu Sistema Informasaun no Aplikasaun (DDSIA) atribui sertifikadu apresiasaun ba funsionáriu na’in lima (5) husi Ministériu Interior nian ne’ebé konklui ona formasaun kona-ba jestaun administrasaun portal.

Iha enseramentu ba formasaun ne’e, Diretór Diresaun Dezenvolvimentu Sistema Informasaun no Aplikasaun Sr. Justo Fernandes, agradese ba ekipa rua ne’ebe konklui ona formasaun no TIC TIMOR nu’udar Ajénsia Teknolojia Informasaun no Komunikasaun prontu atu fó nafatin apoiu tékniku bainhira presiza.

Diretór DSIA hateten, formasaun ida ne’e tenke kontinua hodi atualiza informasaun sira liu hosi portal atu nune’e, públiku bele hatene servisu Ministériu Interior ninian tanba públiku seidauk hatene instituisaun Governu barak iha Timor-Leste.

“Dala barak ita nia sidadaun sira hatene informasaun liu husi media soiál ne’ebe la garantia informasaun ne’ebe kredivel tanba informasaun falsa sira bele espalla iha spasu publiku sira tanba ne’e atu garantia informasaun ofisiál iha média sosiál, maka liu husi portal Governu nian deit maka sei garantia informasaun ofisiál sira maske Governu troka malu maibé informasaun nafatin iha hodi garantia memória institusionál,”

Iha fatin hanesan, Asesor Tékniku Ministériu Interior, Sr. Francisco Simões hateten, publiku sei koñese Ministériu Interior liu hosi média tanba ne’e, portal importante tebes atu tranzmite informasaun Ministériu nian ho tranzmisaun ofisiál no seguru.

Ministériu Interior nia parte mós agradese ba TIC TIMOR ne’ebé apoiu ona fó formasaun tanba funsionáriu sira presiza tebes tuir formasaun ne’e hodi bele halo servisu diak liu tan.

Asesór Tékniku ne’e salienta tan katak, formasaun ne’e sei kontinua hodi lori dezenvolvimentu iha área média nian ne’ebé bele hatutan informasaun hosi Ministériu Interior ba públiku atu bele akompaña progresu dezenvolvimentu nomós progresu lubuk ida ne’ebé maka sei mai.

Entretantu formasaun ne’e, hala’o durante loron tolu (3) iha edifísiu Ministériu Interior Vila-Verde-Dili.

(MÉDIA TIC)