DIRETÓR EZEKUTIVU AJÉNSIA TIC TIMOR I.P. HALA’O ENKONTRU HO S.E. MINISTRU INTERIOR

Díli, 29 Janeiru 2024- Diretór Ezekutivu Ajénsia TIC TIMOR I.P. Sr. Venâncio Pinto, S. Kom. no Ekipa hala’o enkontru kortezia ho S.E. Ministru Interior Sr. Francisco da Costa Guterres iha edifisíu Ministériu Interior (MI) Vila-Verde.

Objetivu husi enkontru ne’e, parte Ajénsia TIC TIMOR nian hakarak rona direta orientasaun husi S.E Ministru Interior oinsa atu dezenvolve Aplikasaun bazeia ba nesesariu sira ne’ebé MI presija tanba apoíu husi nivél politika importante tebes hodi dezenvolve servisu tekníku sira iha Instituisaun estadu nian.

Iha enkontru ne’e, Diretór Ezekutivu TIC TIMOR I.P. Sr. Venâncio Pinto S. Kom. hatete, Ajénsia TIC ninia ezistensia prinsipíu maka atu dezenvolve di’ak liu tan setór Teknolojia Informasaun no Komunikasaun hodi hafasil servisu ho kualidade di’ak ba Instituisaun Estadu sira hotu.

“Diretór Ezekutivu TIC relata tan katak antes ne’e ita deskute ona oinsa atu fó apoíu ba Ministériu Interior hodi dezenvolve aplikasaun sira ba iha parte imigrasaun nian, TIC TIMOR prontu hodi fasilita servisu hirak ne’ebé presija hodi dijitaliza sistema hirak ne’ebé manual ba eletroniku” dehan Diretór Ezekutivu.

Iha biban ne’e , TIC TIMOR mós informa katak agora TIC mós ninia rede konetividade nasionál agora dadaun to ona 12 Minisípiu, tanba ne’e Ministeríu bele uza liña ne’ebé forneze husi TIC nomos Diresaun Nasionál Infraestrutura no Komunikasaun (DNIK).   

Diretór Ezekutivu dehan, emprinsipiu apoíu nivel politiku importante tebes hodi fó suporta ba TIC,  nune’e iha termus tekníka nian bele iha komunikasaun ne’ebé diak atu implementa servisu tuir duni saida mak Ministériu presija.  

Lori Ajénsia TIC TIMOR lider masímu ne’e, hato’o agradese ba Ministru Interior ho konfiansa ne’ebé fó mai Ajénsia TIC atu dezenvolve Aplikasaun sira ne’ebé bele apoíu servisu MI nian, TIC sei asegura konfiansa hirak ne’ebé fó ona mai Ajénsia.

Bainhira rona esplikasaun husi parte TIC nian S.E Ministru Interior  Sr. Francisco da Costa Guterres apresia ho servisu ne’ebé TIC hala’o tanba tekníku sira ne’ebé servisu iha TIC mesak Timoroan deit tanba ne’e MI hakarak kria kooperasaun ho TIC.    

“Kontenti tebes ho TIC TIMOR tanba bele ona mai apoíu Ministeriu Interior tanba servisu sira ne’ebé MI halo iha ligasaun ba kestaun seguransa tanba ne’e ami presija Timoroan mak tenke dezenvolve bainhira ita koalia soberania ita tenke fó espasu ba Timoroan rasik maka zere” dehan S.E. Ministru Interior.

Entretantu enkontru ne’e, partisipa mós husi Assesor Prinsipál TIC TIMOR Dr. Eusebio Guterres, Diretór Data Center Sr. Rusmin Vicente de Fátima Soares, Sekretaria Diretór Ezekutivu TIC TIMOR Sra. Cesaltina M da Silva Araújo Andrade,  Koordenadór Timor Dijitál TIC TIMOR Sr. Eusebio de Jesus Pinto Exposto Goveia, Assesor Gabinete Ezekutivu Sr. Antonio Predilecto, Assesor Rede TIC TIMOR Sr. Askar Syarif, Xefi Formadór TIC TIMOR   Sr. Norberto S. C, Xefi Dezenvolvimentu Sistema TIC TIMOR Sr. Geovannio Vinhas.

 (Média TIC)