TIC TIMOR FORNESE FORMASAUN JESTAUN ADMINISTRASAUN PORTÁL BA FUNSIONÁRIU IGT

Dili, 02 Abríl 2024 - Ajénsia TIC TIMOR I.P., liu husi Diresaun Sistema no Plataforma (DSP) fornese formasaun kona-ba jestaun administrasaun portál ba funsionáriu sira iha Inspetor jerál traballador (sigla portugues - IGT). 

Objetivu hosi formasaun ne’e, atu fahe informasaun kona-ba oinsá atu jere no administra portal refere hodi partilla informasaun sira IGT nian ba iha públiku. 

Iha abertura ba formasaun ne’e, Inspetor jerál traballador Sr. Frederico Pereira de Matos hateten, tama ba mundu global, hotu-hotu tenke adopta ona dijitalizasaun ba sistema hotu inklui informasaun sira. Liu husi meius ida ne’ebe bele transmite informasaun kona-ba servsiu sira IGT nian ba iha públiku atu bele asesu. 

Inspetór esplika katak, ida ne’e maka fó forsa ba IGT oinsá buka dalan hodi bele hetan kanál ida, hodi espalla informasaun sira ba iha públiku tanba durante ne’e, IGT nia atividade barak to’o iha munisípiu sira maibé laiha publikasaun ofisiál tanba sistema manual hela. 

“To’o agora públiku seidauk hetan informasaun barak kona-ba servisu sira IGT nian tanba antes ne’e laiha portal rasik maibe agora TIC TIMOR dezenvolve ona portál ofisiál hodi bele transmite informasaun sira kona-ba progresu servisu ne’ebé la’o hela,” esplika Inspetór Jerál Traballador. 

Lider másimu IGT ne’e mós informa katak, iha tempu tuir mai sei iha akordu nivel tékniku nian nomós akordu nivel altu nian seiduak kumesa maibé servisu hahú la’o ona atu nune’e bainhira iha akordu, servisu hirak ne’e organizadu ona bele halo lansamentu. 

Iha fatin hanesan Xefe Departamentu Formasaun TIC TIMOR nian, Sr. Norberto Cristovão esplika katak, formasaun portál IGT nian ne’e bazeia ba pedidu ne’ebé maka hato’o ona mai iha TIC TIMOR hodi dezenvolve portál IGT nian. 

Xefe Departamentu ne’e informa tan katak, Portál ofisiál ne’e atu fasilita IGTL hodi partilla informasaun ne’ebé maka IGT iha ba iha públiku ho di’ak tanba agora dadauk iha Plataforma barak ne’ebé laos ofisiál ho nune’e, liu husi portál ida ne’e, fasilita ona públiku sira ne’ebé hakarak hatene informasaun kona-ba IGT nian bele asesu direta ba iha website ofisiál ne’e. 

“Formasaun ida ne’e, atu fahe informasaun kona-ba oinsá atu halo jestaun ba portál ne’e, atu nune’e ba futuru parte IGT maka sei jere rasik no partilla informasaun sira ba iha públiku. TIC TIMOR mós agradese ba IGT ne’ebé fó ona konfiansa mai iha TIC TIMOR hodi dezenvolve portál ofisiál,” informa Xefe Departamentu Formasaun.

Entretantu formasaun ne’e, sei hala’o durante loron tolu iha edifísiu IGT Hudi-Laran. 

(MÉDIA TIC)